Video: Genç mediklär giderlär işlemää dolaylara: taa biri onnardan geldi Kişinövdan Komrada
Bitki yılların içindä devlettä belli ediler genç uzmannarın etişmemezlii mediţina uurunda. Gagauziyada teklif etmää deyni doktorları dolaylara, çalışȇr programma, angısına görä veriler yardım. Bizim süjetin kahramanı — otolaringolog Aleksandr Bokan, başarıp medik institutunu, kararladı brakmaa şamatalı Kişinöv kasabasını da erleşmää Gagauziyaya Komrat kasabasına. Bir yıldan zeedä o kableder hastaları erideki poliklinikada, diil çoktandan da başladı yapmaa operaţıyaları bolniţada. Onnar 15 yıl nıcä geçirilmäzdilär. Genç uzmanın işi için üürendi Zinaida Kanţır.
Biyaz giimnerinnän, tedarlıklarlan elindä — bölä karşılȇr kendi hastalarını küçük operaţıya odasında genç doktor, otoloringolog Aleksandr Bokan. Pazertesi — operaţıya günü, da üülenä dooru o kableder kendi hastalarını, angılarına diil çoktan yaptı operaţıya. Çoyu insannardan, angıalrı ona danıştılar, büük saygıylan sölerlär genç uzman için, angısı yoktu Komratta uzun vakıdın içindä. Onnara sıra gelärdi danışmaa Kişinöva yada başka doktorlara. Şindi var hepsi koşullar deyni geçirmää operaţıyaları hem iileşmää, nışannȇrlar insannar.
“Kendi vakıdında bölä uzman yoktu, da pek zordu. Sıra gelärdi gitmää Kişinöva, biraz palıydı. Şükür, ani bizdä var Aleksandr Bokan, bizä taa kolay oldu. Geleriz ona da kablederiz ilaçları. Saa olsun doktor, o islää. Bana iki afta geeri yaptılar operaţiya, hepsi islää, lafederim, iyerim”.
“Bän kendi lor — doktorlan lafettim geçän yıl. Geldim ona ilaçlanmaa, baktı da sordu, neçin bendän taa almadılar glandaları. Bän korkardım, ama inandım ona, pek sevindi, ani bizdä var bölä genç hem becerikli doktor”.
Zanaatın ayırması için bizim kahraman diil piıman. Taa küçüktän büüdü doktorların aylesindä, da ayırarkana kendisinä zannaat, soruş gitmää osa gitmemää mediţina uuruna durmazdı. Ama ayırdı maasus otolaringologiyayı derslerin birisindä da hiç pişman olmadı.
ALEKSANDR BOKAN, otolaringolog: “Hepsi oldu bir kıpımda. Bir LOR uurunda derstä, gördüm resimdä pereponkanın plastikasını nicä yapȇrlar, orada vardı 6 çeşit. Bän bunu pek beendim, zerä gördüm ani o pek küçük, da tedarlıklar pek küçük, operaţıya yapılȇr mikroskop altında. Da bän kendimä söledim, ani bän bunu isterim”.
Başarıp medik institutunu, Aleksandr, bıkıp büük kasabanın şamatılıına, kararladı gelmää Komrada. Nicä nışannȇr kendisi doktor, Avtonomiyda onu kablettilär büük havezlän, nicä kollegaları, ölä da paţientları.
ALEKSANDR BOKAN, otolaringolog: “Bän karşı geldim kolegamnan, da o söledi: “Gel bizä, bizdä yok doktor, var bolniţa, tedarlıklar”. Geldim, beendim, lafettim bolniţanın başınnan, da bir aftanın içindä hepsi çözüldü. Bän hiç düşünmedim, ani kalacam Komartta. Bän istärdim gitmää Kişinövdan da işlemää hastalarlan, angıları beni sayȇrlar, hem kimä lääzım benim yardımım”.
Genç doktorun kollegası hem asistentı nışannȇr, ani Aleksandr Stepanoviçin gelmesi mediklerin sırasına verdi kolaylık çoyu insannara kabletmää hızlı hem konsultativ medik yardımını erindä.
SVETLANA TERZİ, asistent: “Sıra gelärdi bizä hastaları yollamaa bizim paţientları Kişinöva, yada özel klinikalara. Vardı fukaarä insannar, angılarına lääzımdı hızlı yardım. Onun için biz sevineriz, ani o geldi bizä da bän onun asistentı oldum”.
Büün devlet verer para hem material yardımını genç uzmannara, angıları hazır çalışmaa devletin dolaylarında. Bölä yardımı kableder Aleksandr Bokan da.
ALEKSANDR BOKAN, otolaringolog: “Finans yardımı için bän işittim. Bän bilärdim, ani açan gelecäm burayi işlemää, olacȇk yardım devlet tarafından. Da bu oldu ii argument, ki ayırmaa Komradı, zerä Komratta tutturdu eni uzmannarı”.
Doktorun plannarında bu yakınnarda diil sade yapmaa operaţiyaları boazda hem doorutmaa burnuda kırıkları, ama rinoplastikayı da yapmaa — bunu için boniţada var hepsi koşullar hem eni avadannıklar. Aleksandr — uzman kendi işindä. Bu iş için sölerlär alışmış paţientlar.
“Bizdä peydalandı otolaringolog, da biz ona danışȇrız — bu pek islää”.
Bizim kahraman taa kendi karyerasının ilk basamaklarında, ama şindän sora var diil bir hasta, angılarını o iileştirdi. Onun işindä ona yardımcı olȇrlar kabledilmiş bilgilär, sevgi insannara hem kollegaların yardımı.
Источник grt.md 03.11.2021