Video: Genç şarapçılar – Sırbu kardaşları şarabin paasını bilerlär
İki genç kardaş Evgeniy hem Aleksandr Sırbu — somelye. Diil çoktan birleşip onnar başladılar şarap yapmaa. Genç şarapçılar büük havezlän işini ilerlederlär. Onnarın ustalıı şansora tanıldı üüsek ödüllärlan. Onnarın baaları Taraklı dolayın Vinogradovka küüyündä bulunȇrlar. Nicä edän bu zanaat çeketti süjetımız açıklȇȇr.
Komrat Devlet Universitetini başarıp şarapçı zanaatında Aleksandr Sırbu Valkaneşin şarap zavodunda master ţehta işledi. 2003-cü yılda Moskvanın restoranında somelye karyerasını çekettirer. Orada da Aleksandr «Nostalji» somelye okulunu başarȇr. Hep bu zanaatı onun kardaşı Evgeniy kabletti. Büün onnar Kaberne Savinyon üzümünü büüderlär 1,8 gektarda.
Evgeniy Sirbu, şarapçı: «Saşa şarabın yapması için cuvap eder, bän malın yapması hem tanıması için. Bän beenerim baalarda işlemää, o maazalarda».
Аleksandr Sirbu, şarapçı: «Jenä beener düş gütmää. O beener kendi-kendisinnän yalnız kalmaa. Bän beenerim maazada şarplan bulunmaa».
Anılmış şarabı yapmaa deyni, saalıklı şarap lääzım, paylaştı Evgeniy.
«Baalarda savaşȇrız işi kırnak götürmää. Tehnikayı yorultmȇȇrız. El işi yapılȇr. Çotuklan lafetmää lääzım, duymaa onu», — açıklȇr o.
Şarap-nicä uşak. Onun lääzım terbietmää da sora şişelerä dökmää, çizgileer Aleksandr.
«Biz isteeriz ölä şarabı yapmaa, ani onu çekmesin birdän içmää, ama yudum-yudum onu tanımaa, dadını, kokusunu almaa. Bardakta görmää, nicä o oynȇȇr hem şıralı rengini. Hem en önemlisi – şarabın ardına şarabı içmää, ama diil imää», — paylaşȇr Aleksandr.
Diil çoktan kardaşlar kendi duuma küüyündä ev aldılar. Onu düşündülär konak evi yapmaa turistlär için, ama bu ideyayı başarabilmää deyni birin yardımı läzım.
«Yardımsız işi başa çıkaramayacȇz. Lääzım çok para. Umutlanȇrız, ani bu meraklı fikiri kimsa tutturacȇk, ki Moldovanın üülen tarafında taa bir turistik eri peydalansın», — söledi Aleksandr Sırbu.
Sırbu kardaşları düşünerlär baaları zeedeletmää, ki haşlamaa inceli hem aromatlı üzümneri. Böleliklän onnar isterlär onnara gelsinnär haliz ii şaraptan annayan insannar.
Источник grt.md 05.11.2021