Gagauziyanın medik kurumnarında etmeer 500 doktor
Komrat rayonun mediţına kurumnarında yardım 70 bindän zeedä yaşayan kableder, onnarın içindä komuşudakı dolayların yaşayannarı da. En sık problema, angısınnan karşı gelerlär mediţına çalışannarı, o doktorların yoksuzluu.
Gagauziyanın saalıı korumak sisteması bitki yılların içindä karşı geler doktorların etmemesi problemasınnan. İlaçlamak kurumnarına 500 uzman etmeer. Te onnar da, kim çalışȇr, taa çoyu yaşlı insannar.
Komrat dolay bolniţasının başı Nina Raylän nışannadı, ani üç yılın süresindä onnara işä eni doktorlar geldi. 2021-ci yılda üç uzman, 22-ci yılda iki genç vraç.
«Biz savaşȇrız yapmaa ölä, ani insan istesin hem beensin bizdä işlemää. Te o genç uzmannar, ani bizdä çalışȇrlar, nezaman sa taa üürenärkänä üüretim praktikasını bizdä geçtilär. Söleriz, ani kuvetlerin dä tarafından yardım onnara var», — söledi Nina Raylän.
2019-cu yıldan beeri avtonomiyanın kuvetleri neetinä koydular kurmaa uygun koşulları deyni genç doktorlar regiona işlemää gelsinnär. Üç yıl geeri Gagauziyada başladı işlemää medik uzmannarını yardımnayan programma. Onun çerçevesindä genç medik uzmanı bir keret kableder ii para yardımını. Bu vakıdın içindä 18 genç medik uzmanı iş kabletti.
«Bizim zaametimiz olacȇydi boşa, eerlim siz bölä çalışkan olmasaydınız. Genç uzmannar desteklenerlär, ki doktor zanaatı olsun taa sorumnu», — nışannadı Gagauziyanın Başkanı İrina Vlah.
Gagauziyada 1500 bin medik çalışȇr. Onnarın arasından 800 kişi Komrat rayonunda işleer. Onnarın sayısı zeedelensin deyni saalıı korumak sferasına lääzım taa zeedä para vermää, çizgiledi Gagauziyanın saalıı korumak bakannıın başı Svetlana Duleva.
«Belliki ki, çok problemamız taa var. Onnar infrastrukturaylan baalı, ilişkilärlän insannarlan, tehnikaylan. Ama bitki yılların süresindä oldu kolayımız saalıı korumak sferamızı üüsek uura kaldırmaa», — söledi Svetlana Duleva.
2021-ci yılda Gagauziyanın saalıı korumak sistemasının büceti 45 million leydän zeedä kurdu.
Источник grt.md
