Moldova Prezidentı Maya SANDU sayêr Gagauziyanın hepsi insannarını “5-ci kolona”
Moldovanın gagauzlar cümnesinin başı Nikolay TERZİ açıkladı, ani üç yılın içindä memleketin milli cümnelerin başlarınınnan hem temsilcilerinnän ikinci buluşmasında Moldova Prezidentı Maya SANDU bildirdi, ani sayêr Gagauziyanın hepsi insannarını “5-ci kolona”.
Buluşmada Prezident Maya SANDU kısadan söledi büünkü durumu, urgulayıp, ani Evropa yolunda lääzım cümneyi birleştirmää.
Nikolay TERZİ açıkladı, ani buluşmada savaşıldı annatılmaa Prezidenta, ani Moldovada, titul națiyadan kaarä, taa 30% başka națiyalardan insannar var da onnar da lääzım respublikanın öndercilliindä bulunsunnar, zerä büünkü duruma görä “Nasıl var nicä Evropay gitmää? Çünkü orada başka türlü”.
Moldovanın gagauzlar cümnesinin başı Nikolay TERZİ söleer, ani, açan o savaşmış “buyur etmää Merkezlän Gagauziya arasında yaklaşmak adımnarı yapmak için kendi tekliflerini, prezident kesmiş onun lafını da sölemş, ani Gagauziya kiminsä 5-ci kolonası”. Nikolay TERZİnin soruşuna: “Acaba bütün Gagauziya mı 5-ci kolona?” Maya SANDU demiş: “Bütünnä!”
Bundan kaarä, Nikolay TERZİ bildirer, ani bütün buluşmada prezident hep demiş “sizin avtonoımiyanız”. Nikolay TERZİnin teklifinä demää “bizim avtonomiyamız”, çünkü Maya SANDU bütün Moldovanın prezidentı, o Moldovanın içindä Gagauz avtonomiyası da.
Moldovanın gagauzlar cümnesinin başı Nikolay TERZİ hem buluşmada pay alan başka insannar da istemişlär prezidenntän PAS partiyasının azalarının konstituțiyaya ters gidän laflarına açıklama hem “neçin televideniyeda hem başka mas-mediyalarda antigagauz propagandası hem milletlärarası kavgaların kızıştırılması kuvetlär hem KSTR tarafından durgudulmêêr?” neyä, belliki, cuvap alınmamış.
Açıklamasını başararak, Nikolay TERZİ dedi: “Prezidenta sölendi, ani, esaba alarak kurulan strategiyalı durumu, milli azınnıklar hem gagauzlar var nicä Evropaya Birliinä gitsinnär, ama diil Romıniya içindän. Prezidenta teklif ediler bu buluşmaları plannı hem sıralı yapmaa”
“Aslısını söleyim, bu buluşmaktan sıkıntılı hem potreli kaldım”, – başardı Nikolay TERZİ.
Источник anasozu.com
