M.Eminesku adına liţeyin eni binanın düzmäk işlerin bitirilmesi soruş altında
Gagauziyanın Başkanı İrina Vlah hem Rumıniyanın Büükelçisi Moldovada Daniel İoniţê dolaştılar Komrat kasabasının M. Eminesku adına liţeyini. Onnar tanıştılar bu üüretim kurumunda eni binanın düzmäk işlerin durumunnan. Bu tek liţey avtonomiyada, neredä uşaklar üürenerlär rumın dilindä. Burada Rumıniyanın hükümetinin yardımınnan eni blok yapılêr. Proekt işledildi 2016 yılda.
Eni korpusun kaldırılması M.Eminesku adına liţeyindä yapıldı 80%-dä, okadar ki işlerin başarılması soruş altında kaldı, çünkü düzüntücülük malların paaları kalktılar iki kat, işleri götürän organizaţiya da üüretim kurumun önderciliini teklif etti enidän baksınnar ödek paralarını.
“Eni blokta lääzımdı yapılsın imeyi pişirmäk odası hem imäk zalı, sport zalı, fizika hem biologiya labaratoriyaları, biblioteka. Rumıniya herzaman bizä yardım eder, sanêrım hem var umudum, ani bu sefer da üzünü çervirmeyecek bizdän. Burada barabar bizmnän çözecek bu soruşları. Paalar üüseldilär iki kat, o üzerä düzücülär da istedilär kaldıralım ödekleri. Bu proektın çeketmesindä belli paralar koyuldular, ama şindiki dünnä durumunda diişildilär koşullar”, — sçledi liţeyin başı Svetlana Stoynova.
Proekt en başta tuttuydu 20,7 milion ley, angılarından 15 milionu verdi Rumıniya, Moldovanın kontribuţiyası kurdu 5,7 milion ley. Ama düzmäk malların paasının kalkması için proekt da paalılandı.
“Biz bileriz sizin dertleriniz için. Var bizim da umudumuz, ani bulacez fondları, da verilecek paralar bu işlerin başarılması için, ki uşaklarda, ne bizim hepsimizin zenginnii, olsun kolaylık hem ii koşullar bu yıl ceviz ayın 1-dä eni blokta üürenmää”, — adadı Rumıniyanın büük elçisi.
Bu soruşları kaldırdı avtonomiyanın Başkanı İrina Vlah Moldovanın hem Rumıniyanın hükümetlerinin barabar oturuşunda.
“Biz sevineriz, ani var havez uşaklarımızda üürenmää devlet dilindä. Gördük, ani 2014 yılda vardı 13 üürenici, bu yıl artık 75 uşak rumınca üürener. Bu Anaların-bobaların düşünmeli seçimi. Onnar annêêrlar, ani şindiki zamanda çok dil bilän insan başarılı olȇr. Bizim sızıntılarımız yok, bu adıma kadar yapıldı, ama şindi lääzım başarılsın, var umudumuz, ani verilecek finanslar da ceviz ayın 1-nädän başarılacek, da uşaklar üüreneceklär”, — söledi İrina Vlah.
Proekt işledildi 2016-ci yılda. Plannara görä eni yapı lääzım hazır olsun üürenmäk için 2022-ci yılın ceviz ayın 1-dan.
Источник grt.md
