Komratta industrial kolecin düzülmesi ilerleer
Gagauziyanın Başkanı İrina Vlah, Moldova başbakannıın yardımcısınnan ţifra tehnologiyaları ilerletmesi soruşlarında Üriy Ţurkannan, Üüretim ministrusunnan Anatoliy Topallan hem Moldovada TİKA kurumun başınnan Selda Özdenooluylan barabar baktlar ne uurda gider Komratta industrial kolecin düzülmesi.
Komrat kasabasında düzülän industrial kolecindä üürenäbileceklär 600 student. Üürenicilerä deyni düzülecek 500 kışılık yaşamak binası da. Bundan kaarä olacek sport kompleksi, düzüleceklär yollar hem binanın ortasında özel dinnenmäk aulu yapılacek. Büünkü gündä sıralanmış işlerin yarısı şansora yapıldı.
Büünkü gündä şansora kaldrıldı kolecin baş binası, koyulȇr binanın örtüsü. Bu işlärlän barabar binanın içända da işlär ilerleerlär. Regional kuvetleri proektä görä buradan geçan elektrik yollarını çıkardılar binanın bir tarafına. Bundan kaarä onnar lääzım katılsınnar komunikaţiya işlerin gerçeklemesinä dä.
“Buradan geçärdi 10 bin kilovoltluk elektrik yolları. Regional bücetindän verildilär finanslar onnarı buradan çıkarmak için. Bundan kaarä biz cuvaplıyız gaz , su hem kanalizaţiyanın geçirilmesi için dä”, — haberledi Gagauziya infrastruktura bakannıın başı İvan Kolioglo.
Gagauziyanın başkanı İrina Vlah nışannadı, ani bu kolecdä gençlär kabledäbileceklär bölä zanaatları nicä: kompüter programaları uurunda hem elektromehanika uurunda. Hepsi onnar işleyäbileceklär sora Moldovada.
Moldova Devletinin üüretim ministrusu nışannadı, ani bu kolecdä hazırlanan uzmannar pek lääzım devletimizä.
“Bu pek büük bir proekt. En ilkin plannandıydı yapmaa burada liţey, ama sora kararlandı kolec düzmää. Sayȇrız, ani burada hazırlanaceklar uzmannar, angıları pek lääzımnı diil sade Gagauziyaya, ama Moldovaya deyni dä”, — nışannadı ministr.
Moldovanın İT ministerliin öndercisinin yardımcısı nışannadı, ani Moldovanın gençleri büün var nicä bir sırada çalışsınnar halklararası uzmannarınnan da. Bu kolec yardım edecek onnara bu işi gerçeklemää.
“Alarak esaba iş panayırın istediklerini, var nicä söleyim, ani bölä koleclär bizä pek lääzım. Bizim gençlerimiz pek talantlı. Biz pek isteeriz, ki onnar yardımcı olsunnar bizä devletimizi ilerletmää. Pek islää, ani Avtonomiyanın öndercilii bu uura çok kuvet koyȇr hem devletin İT merkezi gibi burasını yapmaa isteer”, — nışannadı ministerliin öndercisinin yardımcısı.
Proekt gerçeklener Türkiye devletin finans yardımınnan hem Türkiyenin prezidentin Recep Tayip Erdoganın göz altında bulunȇr. İlk üürenicileri burada plannȇȇrlar kabletmää 2023-cu üürenmäk yılında.
Источник grt.md
