Dezgincä küüydä neetlenerlär tertiplemää eski okulun binasını
Dezgincedä plannadılar düzmää küüyün birinci şkolanın eski binasını. Ne bulunacek onda hem nekadar bu proekt önemli, annadı bizim televizion grupamız.
Dezgincenin birinci şkolanın eski binası 10 yıldan zeedä kapalı durdu. İki yıl geeri küüyün öndercilii kendi kuvedinnän örtüyü ötää-beeri yamadı. Bu verdi kolaylık binanın bir tarafında iki sport salonunu yapmaa, nereyi büün nicä küçüklär, ölä da büüklär gelerlär. Ama binanın bir payı daanık kalȇr.
“Bıldır bän çıktım bir tekliflän yapmaa smeta hem proekt, angısı verecek kolaylık korumaa binayı hem bişey faydalı uşaklarımıza deyni yapmaa. Plannȇȇrız örtüyü hem odaları düzmää. Ki uşaklara deyni başka çevreleri açmaa hem bu obyekt soţial sport tarafından faydalı olsun”, — açıkladı küüyün primarı Vasiliy Kapsamun.
Geçän yılda yapılmış proektä görä plannanȇr örtünün hem odaların düzülmesi hem binanın bir korpusun yıkılması.
“Hem smeta, hem ekspertiza binaya yaptırdık. Bizdä çıktı 3,5 mln ley. Pek umutlanȇrız, ani yanımızda yardımnan olaceklar Gagauziyanın öndercileri, hem bir omuz da bizä koyaceklar respublikanın öndercileri”, — söledi primar.
Primar çizgiledi, ani bölä obyektlerin düzülmesi için investiţiyaların verilmesi küüyün ilerlemesindä gelecektä belli olaceklar.
“Biz lääzım dooru prioritetları koyalım, prioritet bizä deyni büün bizim uşaklarımız hem innsannarımız. Lääzım yapmaa ölä, ani onnar ilerlesinnär, çünkü internet büün çok iş yapȇr. Bölä erlerin yapılması sa hem ilerledecek küüyü, hem birleştirecek yaşayannarı”, — nışannadı Dezgincä küüyün başı.
Sport salonnarından kaarä binada var tenis masası, yaz vakıdıda da burada şaşki oynamaa deyni er var, nereyä küüyün taa yaşlı insannarı da toplanȇrlar.
Источник grt.md
