Komratta gagauz yazıcıların yaratmaların eni toplumu uşaklara deyni cümneyä tanıtıldı
Komratta uşaklara deyni gagauzi dilindä «Kurt – kuş” dünnesi» eni kiyadın prezentaţiyası geçti. Kiyada Gagauziyanın 23 anılmış yazıcısının yaratmaları girdi.
«Kurt — kuş» dünnesi” kiyadına yazıcılarımızın masalları, annatmaları, söleyişleri girdilär. Toplumu hazırladı hem tiparladı Gagauziya M. Maruneviç adına Bilim – aaraştırma merkezi. Türksoy kurumu da finans tarafını üstünä aldı.
«Gagauz halkı Türk dünnäsının bir küçük payı. Biz herzaman hazırız sizä destek olmaa. Yardım ederiz hepsinä: hem muzıkantlara, yazıcılara, resimcilerä, uşaklara, teatruculara», — söledi Türksoy kurumun temsilcisi Elçin Gafarlı.
Türksoy kurumunnan baalantıyı bu kiyat dünneyi görsün deyni yardım etti Moldova parlamentin deputatı İvanna Köksal.
«İzmet uşaklara sonsuza kadar. Ko gagauz dili üürenilsin. Lääzım lafedelim Ana dilimizdä. Ko dilimiz kayıb olmasın», — söledi İvanna Köksal.
Prezentaţiyada üüredicilär, üüretim kurumnarın öndercileri, yasla terbiedicileri pay aldılar. 9 -cu uşak başçasının başı Anna Kroytor söledi, ani bu kiyat yardım edecek uşaklarlan gagauz dilini havezlän üürenmää.
«Saa olsunnnar te onnar, kim tiparlamış bu kayıdı. Kendi işimizdä onu kullanacȇz. Bän artık onu inceledim. Meraklı masallar, söleyişlär, angıları lääzım olȇrlar gagauz dili derslerindä. Havezlän onnarı üürenecez», — söledi Anna Kroytor.
«Kurt-kuş» dünnesi” masal toplumu evlatlarda sevda hem saygı ana dilinä uyandıracȇk, düşünerlär avtonomiyanın yaşayannarı.
“»Tilki hem kirpi» masalını okudum. Pek beendim onu. Uşaklarlan okuduk hem pek güldük. Havezlän uşaklara okuyacam masalları. Evdä sade gagauz dilindä lafederiz. Bu dil bizä kalmış varlık, onuştan lääzım onu ilerletmää», — paylaştı Gagauziya yaşayanı Aleksandra Kasatina.
«Bän gagauz dilini uşak başçasında üürenerim. Okumaa taa bilmeerim, ama mamu bana masalları okuyacȇk», — söldi Ȇdgar Kasatin.
«Bän kiyadı okudum. Masalların personajları pek meraklı. Meraklı süjetlär. Sanȇrım, ani uşaklar bu kiyadın yardımınnan taa islää bileceklär gagauz dilini», — söledi Valeriya Kazancı.
«Kurt — kuş» dünnesi” toplumu üüretim kurumnarın bibliotekalarına, uşak başçalarına baaşlanaceklar, ki üüredicilär kullansınnar kendi işindä.
Avtor: M.Topal, video: G.Stavilov, montaj: A.Topal
Источник grt.md
