KARAOKE GAGAUZÇA
Çiçek ayın 27-dä «Ana Dilimiz» günü bakılȇr. Heryıl Gagauziyada bu gün türlü olaylar geçiriler. Yortulu gündä Gagauziyanın genel kultura bakannıı tanıştırdı eni proektlän — «Karaoke gagauzça». Başa çıkarmaa bu proekti yadım ettilär avtonomiyanın anılmış artistleri Pötr Petkoviç hem Mihail Paçi. Karaoke toplumun tanıtması Komrat muniţıpiyasının Kultura evindä geçti. Oluş bir salada topladı uşak başöaların hem okulların üürenicilerini. Gagauziyanın Başkanı İrina Vlah pay aladı olayda.
Bitki vakıtlar kuvetlerin önündä ön daava koyuldu ,ki gagauz dili ilerlesin,unudulmasın hem taa geniştän kullanılsın. Kultura bakannıın başı Marina Semönova nışannadı, ani uşaklar Ana dilini lääzım üürensinnär havezlän. Karaoke türkülär dä meraklandıracȇklar hem yardımcı olacȇklar gagauz dilin üürenmesindä.
MARİNA SEMÖNOVA Gagauziyanın genel kultura bakannıın başı:
«Tatlı dilä doymayalım» sizinnän bilä çaldık. Gözäl laflar,gözäl bir cümlä. Halizdän dä hiç doymayalım ,utanmayalım lafetmää tatlı gagauz dilindä. Tatlı bizä deyni neçin zerä o bizim Ana dilimiz. O dilä bizi üürettilär bizim analarımız-bobalarımız.Bizim en önemli daavamız üürenelim hem üüredelim evlat boylarını. Sanȇrım,ani bu gözäl uşaklar çalacȇklar gagauz dilindä».
Karaoke Gagauzça toplumuna girdi 20 gagauz türküsü uşaklara deyni aranjırovkaylan,bu türkü sayıların arasına Gagauziyanın gimnı da girdi. Toplum açıklȇȇr gagauz halkın zengin türkü varlıını. Karaoke gagauzça proektin kurucuları oldular Pötr Petkoviç hem Mihail Paçı. Pötr Petkoviç nışannadı,ani çoktan düşünärdi bölä bir toplum uşaklara deyni çıkarmaa. Taa işlärkänä 80-ci yıllarda okulda hem uşak başçalarında artist esap almış ,ani uşaklara deyni pek az muzika tarafından material var.
PÖTR PETKOVİÇ Moldova Devletin Şannı artisti ,proektin kurucusu:
«Bu proekt çoçuklara deyni, ki bizim kulturamız ilerlesin. Ozaman bizim kulturamız ilerleyecek ,açan biz gagauzça lafedecez. Evdä dä olsak,başka erdä dä olsak var dilimiz — varız biz. Yok dilimiz- yokuz biz. Gördüm ,ani bu türküleri hepsiniz seversiniz hem çalȇrsınız».
MİHAİL PAÇI Gagauziyanın anılmış artisti ,proektin kurucusu:
» Bu bir meraklı proekt oldu uşaklara deyni. O pek lääzımnı,çünkü bir küçük uşaa açan çekettirersin üüretmää türküdän ,piettän,kulturadan, ozaman o uşak büüyer dä olȇr patriot».
«Ana dili» yortusunnan Gagauziyanın yaşayannarını kutladı başkan İrina Vlah. O çizgiledi,ani bu proektin peydalanmasınnan uşaklar havezlän üüreneceklär gagauz dilini.
Uşaklar da,angıları pay aldılar karaoke toplumun yazılmasında söledilär,ani gagauz dilini severlär. Bu karaoke yardım edecek muzika derslerindä hem serbest vakıtta havezlän gagauz türkülerini çalmaa.
İRİNA VLAH Gagauziyanın Başkanı:
«Bizim gagauz dilimiz, gözäl bir dil. Pek isteerim,ani herbir uşak, adam,karı,angıları yaşȇrlar Gagauziyada, bilsin bizim Ana dilimizi. Gözäl lafetsin gagauz dilindä. Bizim dilimiz- bizim ruhumuz».
» Karaoke gagauzça» toplumu verilecek avtonomiyanın liţeylerinä hem uşak başçalarına . Hep ölä Gagauziyanın genel kultura bakannıın başı Marina Semönova nışannadı,ani bu toplum bakannıın ofiţıal internet sayfasında erleştirlenecek. Hepsi isteyennär yakışacȇk onu kullansınnar.
Источник grt.md
