Komratta “Lafet gagauzça -2” akţiyasının çıkışlarını belli ettilär
Kirez ayın birindä başarıldı “Lafet gagauzça- 2” akţiyası. Ona katılan uşaklar kablettilär baaşışları hem şannı diplomnarı.
“Lafet gagauzça — 2” akţiyaya katılmak için, birkaç ayın süresindä gagauzça lafedän uşaklar kısaca videoları yazıp, yarışmanın kurucusuna Güllü Karanfilä yolladılar. Bu yıl akţiyada pay aldılar 34 uşak. Onnarın arasında Kongazçik, Avdarma, Çok — Maydan, Kıpçak, Tülüküü küüyülerdän hem başka küüylerin küçük yaşayannarı.
Uşaklar havezlän pay aldılar yarışmakta. Herbiri onnardan kablettilär baaşışları hem şannı diplomnarı.
“Bizi pek sevindirän, gagauzça lafedän aylelär ortaya çıktı. Bän görerim, ani uşak başçalarında uşaklar islää gagauzça lafederlär. Serbest lafedän uşaklar var. İnanȇrım, ani ana-bobaların üreklerinä indi o duygu, ani uşklarlan lääzım lafetmää Ana dilindä”, — söledi akţiyanın kurucusu Güllü Karanfil.
Çok –Maydan küüyünün uşak başçasının terbiedicisi Anna Arabacı nışannadı, ani uşaklar büük hodulluklan bu akţiyaya katıldılar.
“İsteerim sölemää, ani yıl — yıldan gagauzça lafedän uşakların sayısı zeedelener. Uşaklar büük havezlän yarışmaklara katılȇrlar”, — söledi Anna Arabacı.
Akţiyanın istediklerinin biri, uşak gagauzça lafetsin diil sade uşak başçasında hem şkolada, ama ayledä dä. Ana-bobalar annadȇrlar, ani yarışmak büük stimul olȇr ayledä uşaklan gagauz dilindä lafetmää deyni.
“Evdä savaşȇrım sade gagauz dilindä lafetmää. Sanȇrım, ani gagauz dilini lääzım ilerletmää, uşklar lääzım bilsinnär gagauz dilini ki uşaklar unutmasınnar, zere görerim, ani bizim dilimiz başlȇȇr kaybelmää . Saa olsun Güllü Karanfil ani bu yarışmayı yaptı. Uşakların var kolaylıı ilerletsinnär kendi becermeklerini, bän sevinerim, ani uşaam çıkȇr bireri”, — söledi Çok-Maydan küüyünün yaşayanı Alöna Dimova.
“Lafet gagauzça — 2” akţiyası ikinci sıra geçiridı. Ona katılan uşaklar gagauzça videoları yazıp, kendi sevgilerini Ana dilinä gösterdilär.
Источник grt.md
