Komratta başladı işlini mediţina avadannıklarını yapan kompaniya Germaniyadan
Mediţina avadannıklarını yapan kompaniya Germaniyadan açtı işletmeyi Komratta. Büünkü günä orda işler 20 insandan biraz zeedä. Ama yatırımcı bu uurda durgunmayacaanı hem yakında taa bir işletmeyi açacaanı söledi. Açılmış işletmeyi dolaştı Gagauziyanın Başkanı İrina Vlah.
Yatırımnar (investiţiyalar) Gagauziyaya deyni her zaman ön plandayılar. Onnar vererlär kolaylık açmaa eni iş erlerini avtonomiyanın yaşayannarına deyni, nışannadı Gagauziyanın yatırım agentstvosunun başı Natalya Kojokar.
«Biz pek sevineriz , ani bu kompaniya geldi Gagauziyaya, geldi bizä. Bizim insannara lääzım iş. İşleer şansora 24 insan. Onnar üürendilär hem geçtilär praktikayı Vengriyada», — annattı Natalya Kojokar.
İnsannar, angıları kompaniyada çalışȇrlar, eni işinä sevinerlär, ani var kolaylık ana tarafında çalışmaa.
«Hepsimizin ayleleri var, onnarı lääzım bakalım hem doyuralım», — paylaştı çalışannarın biri.
«İşimizi pek beendik. Üürendik Vengriyada – islää bir denemä bizim için oldu», — söledi taa bir çalışan.
Kompaniyanın temsil edeni Evgeniy Kutulupov açıkladı, ani uzmannar medik avadannıklarını yapȇrlar.
«Bizim kompaniyamız söleer sizä çok saa olasınız, ani seçtiniz bizi. Biz umutlanȇriz ,ani işleyecez barabar çok yıl ,da gedecez pek uzak, açacez taa da çok iş erlerini», — söledi o.
Gagauziyanın Başkanı İrina Vlah sayȇr, ani bu proekt pek önemlı avtonomiyaya deyni.
«Biz göreriz, ani insannar bu işi severlär. Umutlanȇriz, ani olacek ikinci etap, açan taa çok iş erleri açılacek. Bizim insannarımız pek işçi hem arif. Umutlanȇrız, ani hepsi olacek islää!», — söledi başkan.
Kompaniyanın öndercileri plana koydular açmaa taa 600 kvadrat metrada eni işletmeyi.
Foto Gagauziya başkanın Facebookta sayfasından
Источник grt.md
