Başkan hem Polşanın Moldovada büük elçisi Komratta dondurma işletmesini dolaştılar
Gagauziyaya tanışmak vizitinnän Polşa devletinin büükelçisi Moldovada Tomaş Kobzdey geldi. Onnar tanıştılar avtonomiyanın kimi kurumnarının işinnän.
HoReCa uurunda çalışan kurum Komratta 2017-ci yılda regionun hem Evropa birliinin finans yardımınnan işlemää başladı. Kompaniyanın temelcisi Väçeslav Duduş nışannadı, ani bu yılların süresindä çalışannarın sayısı zeedelendi. Bu iş için çok kuvet koyuldu.
“Bän çekäbildim Kişinövdan aşçıyı, angısı pe üüsek uurda işläärdi. O, brakıp işini orada, karısınnan Komrata geçti. Karısı büün işleer doktor. O da bizdä işleer”, — açıkladı Väçeslav Duduş.
Aşçı-tehnolog İuriy Dimitroglo nışannadı, ani pişman olmȇȇr, ani geldi burayı.
“Bän pek çok işlemää başladım, ilerleerim her gün. Başladım dondurma yapmaa hem pek sevdim bu işi. Büün şansora istämeerim geeri Kişinöva dönmää. Sade anama musaafirlää giderim. Bän pek sevdim burasını. Burada raat, yok kaçınmak. Pek kısmetliyim, ani burada bulunȇrım”, — paylaştı İuriy Dimitroglo.
2021-ci yılda kompaniya başladı taazä keçi südündän dondurma yapmaa. Büün burada yapılan dondurmanın 20 daadı var. İlerletmää deyni bu işi, uzmannar dayman başka devletlerä üürenmää giderlär.
“Biz istämeeriz birisinä benzemää. Biz ayırılȇrız başkalarından onunnan, ani sade taazä malları kullanȇrız. Bana her sabaa taazä süt getirerlär, bän onu pasterizaţiyadan geçirerim da ondan dondurma yapȇrım. Gelato ayırılȇr dondurmadan onunnan, ani onu taazä süttän yapȇrız”, — annattı İuriy Dimitroglo.
Şindiyädän dondurma yapmasınnan Gagauziyada kimsey zanaatlanmazdı, bu ilk kompaniya, angısı bu işi yapȇr.
“Bu unikal bir kurum, angısında işleerlär pek talantlı insannar. Gururum, ani bu kurumun malını diil sade bizdä, ama bütün Moldovada bilerlär”, — söledi Gagauziyanın başkanı İrina Vlah.
Maasuz büükelçiyä gösterdilär dondurmanıyı yapmak tehnologiyasını.
“Bu pek meraklı bir proekt hem cümnä için yapılmış. Onun maanası büük diil sade Komrat için, ama bütün region için dä. Burada pek tatlı dondurma yapılȇr. Sevindirer, ani çalışȇrlar burada gençlär. Pek sevdim burasını”, — söledi Polşa devletinin Büükelçisi Moldovada Tomaş Kobzdey.
Büün kurumda yakın 100 insan işleer, ama onnarın sayısı, kurum büüdükçä, zeedelener.
“Saa olsun kurumun öndercisi, ani açȇr eni iş erlerini bizim yaşayannarımıza deyni”, — söledi başkan.
Bu kurumdan kaarä Büükelçi bulundu Gagauziyanın kimi başka kurumnarında da.
Источник grt.md
