Komrat sport liţeyinin serbest güreşçileri eni ödülleri kazandılar
Komrattakı sport liţeyinin üürenicileri kazandılar ödülleri Moldova çempionatında serbest güreşindä. 6 taane medali getirilär sportçular: 1 ilk er, 1 ikinci er hem dört 3-cü er.
İlk eri 74 kila uurunda, ilk eri aldı Gagauziyanın sportçusu Grigoriy Kara. O taradı hepsi güreşleri.
«Bän 4 güreş geçirdim, hepsini da taradım. 74 kila uurunda pay aldım», — annattı çempionatın tarayıcısı Grigoriy Kara.
Roman Keţkar Moldovanın çempionatında aldı 3-cü eri.
“Güreştim Kişinevdaki poliţiya izmetçilerinnän, da oldum 3-cü. Liţeydä bizi islää hazırladılar, trenerlar herzaman yardım ederlär bizä, yannışlıklarımızı belli ederlär”, — paylaştı bronza ödülcüsü Roman Keţkar.
“Kazandım 3-cü eri, güreştim devletin oolarınnan, en önemli ani yaralanmadık”, — söledi bronza ödülcüsü Vitaliy Dragnev.
Sportçuları üüreder İlya Esir. O nışannadı, ani çalışkannık hem disţiplina vererlär ii çıkışları. O ii fikirlärlän aklılarına getirder yarışmakları, angılarında kendisi pay aldı. Trener haberledi , ani güreşçi Grigoriy Kara, angısı aldı ilk eri, katılacek Moldovanın millet komandasına.
“Onnar üürenerlär sport liţeyindä, da ii çıkışları göstererlär. Onnar becermekleri gösterdilär üüsek uurda. İi çalımnarını aldılar hem ilerledilär bu uurda. Kim aldı ilk eri, taradı kolaylıı katılmaa Evropa çempionatına. Herlim orada onnar üüsek çıkışlara gelärsaydılar, ozaman dünnä uuruna kalkaceklar yaraşmaklarda”, — açıkladı İlya Esir.
Trener Födor Tukan nışannadı, ani uşaklar herzaman getirdilär ödülleri.
“Savaşêrız üüretmää onnarı ii insan olsunnar, çalışsınnar hem üürensinnär sport liţeyindä. Sportçular lääzım sport liţeyindä üürensinnar”, — nışannadı trener.
Şindi sportçular liţeydän başladılar hazırlanmaa çempionata, angısı geçecek Rumıniyada.
Источник grt.md
