Komradın yaşayannarı danıştılar primariyaya koysunnar yolların birindä araba kösteeni
Komsomolskaya hem Kotovskiy sokaan yaşayannarı danıştılar kasabanın primariyasına, ki onnarın köşesindä koysunnar maasus yol kösteeni, ki maşinalar hızlı gitmesinnär. Bu yollarda arabacılar sık hızlı giderlär da oynayan uşaklar yol boyunda yada trotuarda var nicä yaralansınnar. Analar — bobalar korkȇrlar kolvermää uşakları sokaa.
Uşakların korunması analara deyni ilk erdä bulunȇr, maasus yaz vakıdında, açan onnar taa sık oynȇȇrlar sokakta yada gezinerlär lisapetlerdä, samokatlarda yol boyunda Kotovskiy hem Komsomolskaya maalelerindä. Analar — bobalar nışannȇȇrlar, ani bu yolun payı pek korkunçlu. Maasus avşamneen, açan çok uşak oynȇȇr sokakta.
“Ko primariya koysun burada baryer, zerä burada pek çok uşak, biz korkȇrız kolvermää kendi uşaklarımızı. Arabalar pek hızlı giderlär, bakmadaan, ani önündä kimsa var. Onnar hiç durgunmȇȇrlar, lääzım nesä olsun, bir uşaa ursunnar, da ozaman nesä yapaceklar”.
“Yolun bu payında arabalar pek hızlı giderlär, burada pek çok uşak, pek çok ihtiar insan, angıları bu yolu hızlı geçämeyceklär, uşaklar da sık çıkȇrlar yola, çünkü yok oyun meydanı. Oynȇȇrlar yol boyunda, bu pek korkunçlu. Onun için biz danıştık primariyaya ki koysunnar yol nışannarını yada baryer”.
Kotovskiy sokaan yaşayannarı şindän topladılar imzaları da danıştılar kasabanın primariyasına istemeklän, ki esaba alsınnar bu problemayı da koysunnar lääzımnı nışannarı, yada yapsınnar oyun zonasını. Cuvap erli kuvetlerdän geldi butakım:
“Bän yazdım danışmak primariyaya, ya nışannarı koysunnar, ya baryȇrı, geldi cuvap, ani danışmak bakılȇr, hepsi komuşular imzalarını koydular, onnar hepsi isteer ki burada durum çözülsün, ama bakȇrım bişey yapmȇȇrlar, bilmeerim nezaman bunu yapaceklar ”.
Bölä durum obşejitiye yapısının önündä dä, neredä hiç yok aul, da uşaklara sıra geler oynamaa yada gezinmää lisapetlerdä yol üstündä. Urgulayacez, ani Komsomolskaya sokaan bu payı pek dar, arabalar da iki tarafa gider, da bu korkudȇr anaları — bobaları. Bu evin yaşayannarı hep ölä danışȇrlar erli kuvetlerä, esaba alsınnar durumu da evä yakın yada çatrakta koysunnar nışannarı yada baryer. Nicä söleerlär insannar, taa ileri bu sokaan bir tarafı kapalıydı, da taa iiydi.
“Biz yaşȇȇrız o erdä, neredä yok aul, uşaklara sıra geler gezinmää yolda, köşedän sapȇr araba, döner, da biz herkeret geler kimäsä durmaa orada da baarmaa maşına geler, inikunu. Biz herkeret şüpeleneriz onnar için, biz yok nicä yalnız onnarı kolverelim, bizdä herkeret kimsä bekleer onnarı. İsteeriz ki primariya koysun nışan yada baryer köşedä, ki uşaklar oynasınnar korkusuz”.
“Burada pek korkunçlu sokak, biz uşakları yok nicä brakalım yalnız oynasınnar, herkeret arabalar hızlı giderlär, açan lääzım 30 kilometra gitsinnär. Kotovskiy maalesindä hiç yok nicä gezmää diil sade uşaklara, ama büüklerä dä. Arabacılar bunu esaba almȇȇrlar. Yalvarȇrım sizi, kabledäsiniz ölçüleri, bizim uşaklar korkusuz gezsinnär hem oynasınnar”.
Komentariyalar için biz danıştık erli kuvetlerä, kasabanın primarına Sergey Anastasova. O urguladı, ani satın aldılar lääzımnı nışannarı, baryerları, angılarını bu yıl savaşacelar koymaa.
İnsannar bekleerlär nışannarın hem baryerların koyulmasını. Ama analara — bobalara sıra geler ayırmaa — tutmaa uşakları kapalı evdä mi, osa kolvermää sokaa oynamaa, da durmaa şüpeli onnarnan bişey olamasın.
Источник grt.md
