DEPUTATLARIN BRİFİNGI
İniţiativa yardım etmää deyni aylelerä hazırlanmaa okula deyni sayıda 500 ley. Bu proekti verdi Bakannık komiteti , ki bakılsın HT, okadarke deputatlar onu tutturmadı. Okadarke deputatlar açıkladılar kendi bakışlarını bu soruşa, hem belliettilär nekadar lääzım olsun yardım. Da büün bu iş için geçirdilär brifingı.
HT deputatların bir payı sayȇrlar, ani lääzım vermää bin ley herbir uşaa 1-12 klaslaradan hazırlamaa deyni onnarı okula. Hep ölä urgulandı, ani bu parayı vermää her yıl infläţıyaya görä.
LEONİD KİÖSÄ GHT deputatı : — «Bizim kollegalar deputatlar kararladılar yardım etmää bizim ürenicilerä, ama orada bakılȇr sade 30 proţent bütün sayıdan. Onun için ani büün paalar pek üüsek okul avadanıklarına, biz sayȇrız, ani lääzım yardım etmää hepsi uşaklara, onnarın sayısı 15 bindän zeedä».
Kabletmää deyni yardımı proţedurasını lääzım yapmaa pek ilin sayȇr deputat Elena Ürçenko. Finaslar verileceklär ürenmäk kurumnarına, angısı daadacek bu paraları, söleniler deputatların iniţiativasında. Kabletmää deyni yardımı, var nicä olacek yazıp danışmayı okulda, neredä üürener uşak urguladı Elena Ürçenko.
ELENA ÜRÇENKO GHT deputatı : — «Bu yardım herbir ayleyä, gelecek sade ozaman açan verilecek danışmak anadan, yada başka insandan, yada erlem uşak büüksa, var nicä kendisi yazsın danışmayı 11-12 klasın üürenicileri. Okulda yapılȇrlar ödemäk dokumetleri, da onun adına geler finanslar, koyuşȇr maasus insan, angısı verer bu parayı».
Hep ölä urgulandı , ani kimä bu yardım dilläzım, var nicä onu almasın. Deputat Mihayıl Papov nışannadı, ani iniţiativa pek ii, ama geççä, çünkü bitki oturuşta onnar gelmedilär bir fikirä bu soruşta.
MİHAİL POPOV GHT deputatı : — «Olaceydı ii ki insannar kabletsinnär bu paraları üürenmäk yılın çeketmesinädan, zerä maasus aylelär angılarına onnar lääzım şindi, hazırlamaa deyni okula uşakları. Bän umutlanȇrım ani kollegalar tutturaceklar bunu, da paralar geleceklär insannara. Da bu olacek onnara yardım».
Bu kanon proektını deputatlar vereceklär HT bakılsın sıradakı oturuşta harman ayın 31dä.
Источник grt.md 30.08.2022