Kıpçak küüyün yaşaması gençlerin bakışınnan toplu erideki foto okulun kolekţiyasında
Kıpçak küüdä uşaklar savaşêrlar göstermää fotolarında kendi bakışını bu dünneyä, gagauz halkın yaşamasını. En gözäl patretleri var nica görmää üürenicileri albomlarında fotoşkolada, angısı çalışêr Kıpçak küüyün klisesindä.
Kıpçak küüyüdä gençlär koruyȇrlar kendi istoriyasını, savaşêrlar göstermää onu fotolarda. Kıpçak küüyün fotoşkolasında, angısı klisedä çalışȇr, var niça görmää çok foto , neredä gösterili küüyün, insannarın yaşaması.
«Bän beenerim çıkarmaa patredä, bän isteerim üürenmää çıkarmaa partredä. Benim dädumda var büük aylä, bän isterim büüdüynän çıkarmaa onnarı partredä, koymaa bir alboma onnarı. Sora kendi uşaklarıma göstermää, ani bizdä büük ayläydi», — paylaştı fotoşkolasının üürenicisi Elena Tataroglo.
«Biz bu uura geldik büün bakmaa nicä biz dooru yaptık patretleri. Bän burayı pek beenerim gelmää, pek sevinerim ani kablettilär beni», — söledi taa bir başlayan genç fotografçı Tatyana Tataroglo.
Uroklar fotostudiyada geçerlär hergün Kıpçak küüyün klisesindä. Uşaklar üürenerlär dooru hem gözäl fotoları yapmaa.
«Şindiki vakıtta küçük uşaklar da biler foto yapmaa. Ama çoyu bilmeer video hem foto kurallara görä çıkarmaa. Bizim kurs üüreder uşakları dooru hem gözäl bunu yapmaa, göstermää kendi bakışını bu dünneyä fotolarda. Uşaklar üürenerlär hem tehnika becermeklerinä, hem da kompoziţiyayı açıklȇȇrız», — söledi fotoşkolanın üürenicisi Vitaliy Dragan.
Uşaklar annadêrlar, ani bu kurslarda onnar oldular nicä bir aylä, eni dostları buldular. Var ölä da uşaklar, kim üürendiynän, isteer kendi aylesinä fotoları yapmaa.
«İlk gündän taa geldikça burayı, biz üüreneriz çıkarmaa partredä. Ondan kaarä, biz bulduk bırada kendimizä eni dost, angılarınnan savaşêrız barabar yaşamaa, birliktä, olmasın baarışmaklık bizim aramızda», — söleer fotoşkolanın üürenicisi Darya Angelçeva.
«Bän beenerim gelmää burayı, bırada bizi üürederlär nicä dooru çıkarmaa partredä. İsteerim sölemää saa olsun bizim üüredicilär, ani üürederlär bizi çıkarmaa partredä dooru», — annattı fotoşkolanın üürenicisi Marina Orlioglo.
Kıpçak küüyün fotostudiyası çalışêr 2014-yıldan. Kurslara şindi geler 20 uşak, angıları payedili 3 gruppaya yaşlara görä . Başardıynan üürenmeyi, hepsi uşaklar kabledeceklär sertifikatları.
Источник grt.md
