Halk Topluşunda teklif ederlär en ii sportçulara ödemää yarım mln leya yakın
GHT deputatı İlya Uzun hazırladı kanon proektini, angısı baktırȇr yardımı Gagauziyanın sporçularına. Avtor nasaat eder vermää en ii sporçulara finans yardımını sayıda 450 bin ley. Gagauziyada var çok talantlı sportçu, angıları kazandılar üüsek becermeklerini sport uurunda. Bizim çocuklar kaldırȇrlar devlet bayraanı halklarası yarışmaklarda. Te onnardan, kim olacek Evropa çempionu, dünnä yada olimpik oyunnarın ödülcüsü, kabledeceklär bu yardımı, bakılȇr dokumentta.
Sportçular, kim yaşȇr Gagauziyada, angıları 2000 yıldan oldular Dünnä Evropa hem olimpik oyunnarın çempionnarı yada ödülcüleri, kabledeceklär finans yardımını sayıda 450 bin ley. Bu bakılı kanon proektindä “Soţial uurunda tutturmaa deyni Gagauziyanın anılmış sportçularını”. Onun avtoru Gagauziya Halk Topluşunun deputatı İlya Uzun. Paraları plana koyulu vermää regional büdjetından. Nicä urguladı deputat, avtonomiyada var ölä çocuklar hem kızlar, angıları kabledeceklär bu yardımı.
“Erlem bizim sportçular kabledäydilär 2-3 bin iki keret gündä geçirip sınışları, inanın, onnar zanaatlanaceydılar sportlan, da onnara lääzım olmayceydı ödüllär için para, ama nicä biz onnardan bekleriz çıkışları, da sportta tarȇrlar en kaavilär. Biz lääzım onnarı halizdän baaşışlayalı ki onnar hodulluklan tanıttırsınnar Avtonomiyayi”, — söledi İlya Uzun.
Deputat Aleksandr Tarnavskiy nışannadı, ani kanonu kabledärsaydılar, o girecek kuvedinä büük ayın birindän 2023 yıldan, da sportçular var nicä olacek kabletsinnär finans yardımını.
“Kanon açıklȇr sportçuların maasus becermeklerini da o çekedecek işlemää gelän yılın çeketmesindän 2023 yıldan. Erlem onu kabledärsaydılar deputatlar hem gagauziyanın başkanı. Şindi finanslar dil lääzım, onnarı kaydıracez gelän yılın büdjetına, sayȇrım kanon uygun. İsterim işitmää çocukları, nekadar bu kanonda açıklandı onnarın becermekleri. Onun için, nekdar taa çok olacek doorutmaklar , okadar taa kaliteli olacek kanon”, — söledi Aleksandr Tarnavskiy.
“İsterim şükür etmää İlya Uzunu bu kanon proektı için, angısı sevindirecek bizim çempionnarı hem te onnarı, kim olacek çempion. Da biz kabledecez kanonu, angısı için söledi Aleksandr Grigoryeviç, da insannar bilecelär, ani kanonda bakılı ödemää deyni çempionnara ev için yada başka uura finaslar, angıları koyulaceklar her yıl Avtonomiyanın büdjetında”, — söledi deputat Nikolay Ormanji.
Sportsmennär kendileri kararlayaceklar, nereyı harcamaa kabledilmiş yardım parasını. Hep ölä deputatlar nasaat ettilär vermää sportçulara her aylık stipendiyayi 5 000 leyä kadar.
“Bununnan baalı biz lääzım esaba alalım sport çevrelerini da, angıları işlerlär kasabalarda, küülerdä, almaa onnara avadannık, vermää motivaţiya trenerlara hem sportçulara. Bu pek önemli pay, da lääzım nesoysa kanon proektini hazırlamaa ki bu sistemayı doorutmaa”, — söledi deputat Mihayıl Jelezoglo.
Sportçular nışannadılar, ani Gagauziyada yok pek çok sportçu, angıları kazandılar üüsek Erleri dünnä hem olimpik oyunnarında, da 450 bin leyin vermesi – bu ii stimul gençlerä deyni gitmää ileri hem kaldırmaa devlet bayranı halklararası yarışmaklarda. Eer sportçu sıradakı keret kalkacek üüsek basamaa, ozaman taa bir keret kabledecek bu yardımı.
“Bän isterim açıklamaa ölä , ani pay etmäk dil lääzım, vermää premiyaları gradaţiyaya görä. Bizdä var başka bizim dokumentimiz, ama ne baalı yardım için almaa ev yada başka iş, yada varkana evin, tutturmaa birtürlü yardımlan hepsinä deyni. Nicä sölenildi, ayırmaa dillääzım, bizdä bu uura var kendi dokumetimiz. Ama ne baalı bu programaylan, bän sanȇrım ani bu ii ideya, bakmadaan sän kazandın ilk mi, ikinci mi eri”, — açıkladı bakışını trener Andrey Romanov.
Deputat İlya Uzun nasaat etti vermää 50-şär bin ley sportçulara, kim 35 yaşından büük, da kazandılar master kategoriyasında üüsek uuru. Trenerlar da, angıların terbiedilenneri kazandılar üüsek erleri, kabledeceklär 100 bin ley.
Источник grt.md
