Gagauziyada neetlenerlär Georgiev şiridi kullanmasını koruyan kanonunu kabletmää
Gagauziya Halk topluşu üridik komisiyası geçirdi cümnä seslemeklerini iki kanon proktlerinä görä. İlk kanon proekti «Georgiev şiridi» akţiyası için hem kanon «Gagauziyada Büük Vatan cengin nışannarını kullanmaa» deyni. Kanon iniţiativaların avtoru Gagauziya Halk topluşu deputatı Sergey Çimpoeş.
«Yazarkana bu kanon proektini biz ilkin düşündük, nicä korumaa insannarı hederlez ayın 9-da», çizgiledi Gagauziya Halk topluşun deputatı İvan Dimitroglo, söz tutarkana cümnä okumaklarında.
«Bileriz, ani çoyu hederlez ayın 9-da akţıyaya katılacȇklar. Biz — deputatlar lääzım vatandaşları koruyalım. Onnara var nicä 9 bin ley ceza koysunnar», — söledi İvan Dimitroglo.
Deputat Sergey Çimpoeş nışannadı, ani «Gagauziyanın maasuz statusu için» kanonunda var punkt, angısına görä Halk topluşun deputatlarında var hak kendi kanonnarını kabletmää, herlim Parlamenttä kabledilmiş kanon karşı durȇr avtonomiyanın yaşayannarın haklarına.
«Bizdä var hak avtonomiyamızda kendi kanonnarımızı kabledelim. Te bu sıra biz isteeriz kendi haklarımızı bildirtmää. Bizim vatandaşlar unutmadılar Büük Vatan cengin kahramannarını. Şindi da onnar için korkmȇȇrız bu kanonnarı kabletmää», — söledi Sergey Çimpoeş.
Nicä korumaa Gagauziyanın yaşayannarını cezadan, kendi bakışını açıkladı herzamankı reglament komisiyasının başı Mihail Jelezoglo.
«Biz lääzım düşünelim nicä yaşayannarı koruyacez te o büük cezalardan. Biz korkmȇȇrız politika deklaraţıyalarlan çıkmaa, ama biz lääzım düşünüp tä karar kabledelim. Bizim insannar bişeydän korkmȇȇrlar, o şiritlärlän hederlez ayın 9-da çıkacȇklar», — söledi Mihail Jelezoglo.
Gagauziya Halk topluşu başının yardımcısı Aleksandr Tarnavskiy kendi bakışını açıkladı Georgiev şiridin zap edilmesi için Moldovada. O sayȇr, ani bu yapılȇr ki cümnenin bakışını ekonomikada büük problemalardan başka tarafa çekmää.
«Bu soruşta lääzım çetin kararlar. Nesä lääzım yapmaa ki korumaa yaşayannarı. Ama hep okadar cezalar onnara koyularsaydılar, teklif ederim insannara cezaların bir payı için kompensaţıya vermää. Biz lääzım cuvap edelim kendi yaptıklarımız için», — söledi Aleksandr Tarnavskiy.
Moldova Devletin Parlamentin kararlanmış kanonuna görä te onnar kim satacȇk, taşıyacȇk georgiev şiridini hem cümnä erlerindä kullanacȇk bukvaları Z hem V cezalanacȇk . Vatandaşlara var nicä 4500 bindän 9000 binä kadar ceza koysunnar,yada 30-60 saat cümnä işleri.Üüridik hem devlet çalışannara 9 bindän 18 bin leya kadar ceza koyulacȇk.Ama bakmayarak buna kanona görä georgiev şiridini zap etmeerlär nicä ödülün bir payını.Te onnar kim korudu Vatanımızı hem kabletti georgiev şiridinnän ödülü ,var nicä onu taşısın. Çiçek ayın 19-da Moldovanın Prezidenti Mayä Sandu imzaladı kanonu,angısı zap eder georgiev şiridini kullanmaa. Dokument başladı çalışmaa Monitorul Oficial dergisindä tiparlamasından sora.
Источник grt.md
