Çempionnara – millionnar. Nicä Halk Topluşunda bakıldı kanon sportçuları finans desteklemesi için
Gagauziya Halk Topluşu ilk okumakta «Gagauziyanın şannı sportçularını finans desteklemesi için» kanonunu kabletti. Nicä kanon kabledilmesi proţesi geçti, materialımızda.
Gagauziya Halk Topluşu oturuşu başlamadan trener, grȇppling sport çeşitindä dünnä çempionun Alleksandr Romanovun bobası Anatoliy Romanov danıştı Bakannıık Komitetinä hem deputatlara tekliflän kabletsinnär «Gagauziyanın şannı sportçularını finans desteklemesi için» kanonunu. Onun bakışına görä kanon verecek kolaylıı gagauz sportçuları raat sportlan zanaatlansınnar kendi Vatanında, ki para yoksuzluu beterinä onnar aşırıya gitmesinnär.
«Bu kanon verecek kolaylıı bizim sportçularımızı devletimizdä tutmaa, paraylan yardım etmää. Ozaman onnar burada kalacȇklar. Ki gelecektä dä, genç olannara yakışsın devlettä zanaatlanmaa sportlan hem Gagaziyayı hem Moldovayı bildirtmää başka halklarda. Getirmää medalileri hem ilk erleri kazanmaa. Olmasın ölä, ani pyedestalda durȇr bizim çoçuk, ama başka devletin gimnı öter», — söledi Anatoliy Romanov.
Halk Topluşu hazırladı kanonu soţıal yardımı için şannı sportçulara. Ani onu lääzım kabletmää dayman sölärdilär deputatlar İlya Uzun hem Nikolay Dudoglo. Onnarın bakışına göörä sportçular eterli yardımı avtonomiyadan kabletmeerlär, bakmayarak ona, ani medalileri getirerlär.
«Bizdä var gençlär, angıları dayman çempionatlardan medalileri getirerlär. Ama onnar bu kanonun kabletmesinin önündä ne kazandılar sayılmȇȇr. Onnar bir sıra para kabledeceklär. Ötää dooru kim getirdi medalileri, lääzım herbiri için para kabletsinnär. Neçin? Büün sportçular en fukaarä. Bakın onnara, onnarda bişey yok», — söledi İlya Uzun.
Deputat Nikolay Dudoglo hep ölä kendi sözündä bu soruş için bakışını söledi. O şükür etti deputatı İlya Uzunu, ani o kaldırdı bu soruşu.
«Halizdän, bu kanon lääzım bizä. Bizim sportçular — Gagauziyanın hodulluu. Hepsimiz kendimizi gururlu duyȇrız. Gagauziyayı tanȇȇrlar hem bilerlär sportçuların hatırınnan. Onnar medalileri dünnä çempionatlarında hem Olimpiya oyunnarında kazanȇrlar», — söledi Nikolay Dudoglo.
Nikolay Dudoglo danıştı Bakannıık komitetinä, Gagauziyanın başkanına İrina Vlaha, tekliflän kayıl olsun kanonnan.
«Burada iki moment var. Bän diilim kayıl hepsinnän. Teklif ederim olimpiya oyunnarın çempionuna 2 million ley vermää. Olimpiya oyunnarın hem dünnä çempionatın prizörlarına 1 million ley. Öbür punktlarlan bän kayılım», — teklif etti Nikolay Dudoglo.
Bakannık Komiteti kayıl oldu sportçulara soţial yardımını vermäk kanonunnan. Bu soruşta söz tuttu sport hem gençlik bakanı Sergey Stoyanoglo. Onun laflarına görä, kanon proektindä var birkaç önemli moment, angılarını lääzım derindän bakmaa.
«Bakannık komiteti derindän üürendi kanonu. İsteeriz, ki ikinci okumaklara etişincä kanon barabar işlenilsin», — söledi Sergey Stoyanoglo.
Bitkidä, kanon için ilk okumakta hepsi deputatlar kendi seslerini verdilär. Taa derindän analiz kanona Halk topluşu barabar Bakannıık komitetinnän yapacȇklar.
Источник grt.md
