Germaniyadan Gagauziyada yaşayannara bir seläm
Büük ayın (yanvar) 21-dä Moldova Respublikasının Gagauziya Avtonom Bölgesindä oldu bir yardımcılık akțiyası. Beşalma, Dezgincä, Kongaz, Kongazçık küülerin hem Komrat kasabasının insannarına baaşış verildi 200 iimeelik paketları, angılarını hazırlamak için finans yardımını uzattılar Germaniyadan “Basıbüyük Internationale Hilfsorganisation gGmbH” hem “Avrupa Yetim-Der Pro-Waisen e. V.” yardım kuruluşları.
Erlerin primarları hazırladılar yardım verilecek ibsabbarın listelerini, neyä görä bu kuruluşların temsilcileri Mahmut BASIBÜYÜK hem Hasan KUYULDAR, küüleri dolaşıp kendiellerinnä herbir insana pfketları baaşladılar..
Mahmut BASIBÜYÜK açıkladı: “İiyilik yapmak bir sanaat gibi, bu üzerä bän hem benim ayläm yardım yapmayı severiz. Herzaman zor durumda olan insannara canımız acıyêr da onnara nekadar yapabileriz yardım ederiz. Basıbüyük halklararası yardım kuruluşu türlü devletlerdä insannara yardım eder: Romaniya, Bulgaristan, Türkiye, Makedoniya, Moldova hem başka. Aylelär hem uşaklar sevinärsä biz da mutlu olêrız. Bu sefer bizim yardımımız etişti Moldovaya, Gagauziyanın dört küüyünä hem Komrat kasabasına. Herbir küü kabul etti kırkar paket. Umut ederim ani herbiri sevindi bu yardıma, az da olsa mutlu oldu. Allaa da bizim iiliimizi kabul etti”.
Hasan KUYULDAR da nışannadı: “Bizim yașamak prințiplerimțzä görä, zor durumda olan yada fikaara olan insannara yardım etmek bizim borcumuz. İilik yapmak o insannık için izsiz kalmayan bir yatırım. Bänâ Avrupa Yetim-Der Pro-Waisen e. V. kurumunun başkan yardımcısı olarakâ bu gün Moldovada, Gagauziyada bulunêrım, buradayım, çünkü bizim insannarın cannnarının sıcaklıını gagauz milletinä getirdim. Bizim için insannık hem yardım yapmak önemni, bu üzerä istedik Gagauziyanın 200 aylesini sevindirmää onnara imeelik paketları daatmaa. Bän annêêrım, ani bu baaşışlar olmasa da ömür ilerleyecekti, ama bu bizim insannardan bir sıcak selämimiz. Gagauziyaya. Moldovaya ilk sıra gelerim, ama kendimi burada yabanci hiç duymadım, insannarlan türkçä-gagauzça raat-raat annaşabildik. Bu bizim ilk adımımız, ondan sora taa gözäl hem hayırlı işleri gagauz halkı için aslıya çıkaracez. Umut ederim, ani kısa zamanda burada, Gagauziyada, başka soțial proektlarını kuracez”.
Bu yardım akțıyasını geçirilmesindä pay alan Gagauziya üüredicilik Upravleniyasının zaametçiykası Lidiya OSTAŞ, Gagauziyanın 200 aylesinin adından, bütün candan şükür etti Germaniyadan gelän paalı musaafirlerä da açıkladı, ani herbir aylä halizdän sevindi da yardımı getirennerä hem verennerä saalık hem ii başarılar diledi. Onnarın yolları acık olsun, onnarın hayırlı işleri çok taa insannara kauşsun, etişsin.
Источник anasozu.com
