Türkiyedän yardım yufka durumda bulunan aylelerä deyni verildi Gagauzya dolaylaların üçünä dä
Gagauziyada 1,5 bindän zeedä aylä kabledecek yardım ТİКА türk agentstvosundan. Kutuların içindä imek malları, angılarını Türkiyedä kutlanılan Ramazan bayramına görä veriler.
Aprelin 20-ndä fura yardımlan geldi Gagauziyaya. Yardım verildi avtonomiyanın dolayların 3 kasabasında önderciliin temsilcilerinä. Bundan sora onnar verilecek aylelerä.
“Küülerä daatmak üzere ihtiaç olan insannara afet olsun. Öbür projelär herzaman devam ediyor. Her küüydä bir iz brakȇrız. Allah hepsimizä güç versin, saalık versin. Biri-birimizä yardım ederiz, gözäl projeleri yapȇrız. İhtiaçlarımızı birlikte düşünüyoruz, nasıl yapacez, nasıl kapatacez. Hepsinizi Paskellä yortusunnan kutluyorum, burayı gelmeniz için teşekkür ediyorum”, — söledi TİKA agentstvosunun Kişinevda koordinatörü Selda Özdenoğlu.
Erli kuvetlär önderciliin temsil edenneri şükür ettilär TİKA agentstvosunu yardımnarı için.
“İleri dooru işleyelim bilä. Biz nicä küçük kan kardaşlar taa yufka, siz taa kaaviysiniz, her zaman yardım edersiniz”,- söledi Çadır dolayın başının işini götürän Natalya Şoşeva.
“Unutmȇȇrsınız yufka insannar için, onnara yardım edersiniz. Saa olasınız, ani biz herzaman barabarız”, — söledi Kiriet-Lunga küüyünün primarı Valentina Kaykı.
“Yardım oldu Gaydara da. Duva ederiz saalınız olsun. Taa gözal yaşamak yapalım. Bizim dä insannarımız kalkınsın. Herkeret gelersiniz kucaanız dolu. Gaydar küüyündän sizä seläm. Siz büük iş yapȇrsınız. Var zorluklar. İnsan pek seviner bu yardıma”, — söledi Gaydar küüyün primarı İlya Kiosä.
“TİKA-dan yardım geldi. Sizdä büük yortu, bizdä dä. Biz onu pay edecez çok uşaklı aylelerä hem yatalak insannara. Türkiye devletin insannarını da kutlȇȇrız”, — söledi Kazayak küüyün primarı Anatoliy Uzun.
Valkaneş dolayında da hep yardım kablettilär insannar, angıları buna pek sevindilär.
“Bizim Valkaneş dolayımıza verildi 500 paket. Bu sayıya girerlär Valkaneş, Etuliya, Çişmikioy, Karbaliya. Pek önemli bulalım insannarı, angılarına bu yardım lääzım, ki onnar da duysunnar yortuyu”, — açıkladı Valkaneşin primarı Viktor Petrioglu.
Источник grt.md
