Kongazda Ukraina vatandaşlarını kabledän merkezinä geldi yardım Almaniyadan
“BASIBÜYÜK” halklar arası yardım kuruluşu uzattı yardım elini Kongaz küüyünün merkezinä, neredä büün kablederlär Ukrainadan gelän insannarı.
Kızçaaz Maşa bir yaşında, Ukrainada gidän cenk için o, elbetki, aklısında bişey tutmayacek, ama büün o şansora annȇȇr, ani bulunȇr evdän uzakta. Maşacık anasınınnan, batüsununnan hem babusununnan Vatanından kaçmak zorunda kaldı. Büün onnar yaşȇȇrlar Kongaz küüyünün merkezindä, neredä erleştirerlär Ukrainadan gelenneri.
ALEKSANDRA, Ukraina vatandaşı: “Biz pek sevineriz, ani bizi burada kablettilär, arkaladılar hem yardım ettilär. Biz biraz raatlandık. Aslıdan sölediynän beklemäzdik bukadar sıcaklık”.
ALİNA, Ukraina vatandaşı: “Biz braktık hepsini, bän oturdum kocamın maşınasına da, alıp uşakları kucaama hem anamı, çıktım Ukrainadan en yakın devletä. Biz pek şaştık ona, nesoy bizi karşıladılar. Şükür ederiz herbirini, doyurdular, erleştirdilär. Pek ilgilenerlär bizimnän”.
Kongazda Ukrainadan gelenneri erleştirmäk için merkez aftadan zeedä yaşayannarın hem cümnä kurumnarın yardımınnan işleer. Kimin nekadar kuvedi var bu insannara yardım elini uzadȇr. Bölä kurumnarın birisi Almaniyanın halklararası yardım kurumu “Basıbüyük”. Onun volontörları bu insannara yardım getirdilär.
LİDİYA OSTAŞ, “Basıbüyük” halklararası yardım kurumu volontöru: “Biz getirdik yardımı o insannara, angıları kendi evlerini brakmaa zora kaldılar. Saa olsun bizim partnörlarımız Almaniyadan — halklararası yardım kurumu “Basıbüyük” hem onun öndercisi Mahmut Basıbüyük. Umutlanȇrız, ani bu baalantılarımız ilerleyeceklär”.
Büünkü gündä bu merkezin 2-ci hem 3-cü katında 70 kişi yaşȇȇr. Ama Ukrainadan insannar hep gelerlär, onuştan kararlandı birinci katın odalarını da onarı erleştirmek için hazırlamaa.
MAKSİM BOLGAR, Kongaz küüyünün Ukrainadan gelennär için merkezin öndercisi: “Biz burayı getirdik krivatları, matrasları, ama bizdä yoktu yorgan, döşek. Şükür ederiz “Basıbüyük” halklararası yardım kurumun volontörlarını, ani esaba aldılar bu işi da yardımcı oldular bizä. Ukrainadan gelän insannara bu yardım pek lääzım”.
Büünkü gündä Kongaz küüyünün Ukrainadan gelennär için merkezi var nicä kabletsin 160 kişiyä kadar. İnsannara deyni burada var hepsi koşullar. Burada onnara veriler mediţina hem psihologiya yardımı da.
Источник grt.md
