Germaniyadan Gagauziya insannarına yardım çalışmaları
Başlayıp 2022-ci yıldan beeri Gagauziyada hem Moldovada insannık yardımnarını yapêr Germaniyadan “Basıbüyük Internationale Hilfsorganisation gGmbH”. Ölä, 2022-ci yılın Büük ayın (yanvar) 21-dä bunun hem “Avrupa Yetim-Der Pro-Waisen e. V.” yardım kuruluşun finans yardımınnan ilk yardımcılık akțiyasında Beşalma, Dezgincä, Kongaz, Kongazçık küülerinhem Komrat kasabasının insannarına 200 imeelik paketları baaşış verildi.
Bu yardım kompaniyaları büün dä ilerleerlär. Bu yrdımcılıın içindä olan Gagauziya üüredicilik Upravleniyasının zaametçiykası Lidiya OSTAŞ, açıkladı, ani bu yardımnar hep zeedelenerlär. 2022-ci yılın Canvar ayında (oktäbri) “Basıbüyük Internationale Hilfsorganisation gGmbH” yardım kuruluşun başı Mahmut BAŞIBÜYÜK Gagauziyanın uşaklarına deyni ruba hem kusurlular için 6 kusurlular kaläska. Bu kaläskaları kabledennerin taa çoyu yaşlı insannar, angıları kendileri gezӓmeerlӓr hem kendi başına dışarı çıkamêêrlar. Onnarlan birliktӓ hem yanında yaşayan senseleleri urguladılar, ani bu onnar için dä büük bir yardım, çünkü yardımcı olacaklar kusurluları gezdirmäӓ hem soluk almaya çıkarmaa.
Bu yardım akțıyasını geçirilmesindä pay alan Lidiya OSTAŞ acıkladı, ani 4 kaläska Kongazçık küüyünӓ etişti, biri – Komrada, biri dä Moldovanın Kapaklı küüyündän bir insana gitii.
2023-cü yılın Küçük ayın (fevral) birinci günündӓ Germaniyadan taa 3 tekerlekli kaläska geldi. Küçük ayın 5-dӓ Lidiya OSTAŞ hem onun yakın kafadarları Elizavetaylan Georgiy ARNAUT bir kaläskayı Kongaz küüyünӓ İosif ZANET aylesinӓ götürdülӓr. Onnarı karşladı ev saabisinin eşi, gülӓr üzlü hem yalpak Doni bulü, angısı teklif etti misafirleri evin içinӓ hem tanıştırdı onun koçasınnan, angısı son günnӓr kendisi gezӓmeer. İosif batü sevindi onun eni yardımcısına – tekerlekli kaläskaya. Doni bulu hem onun kocası saa ol dedilӓr Basıbüyük Uluslararası Yardım Kuruluşunun Başkanına hem musaafirlerӓ, angıları saymadılar zaametlerini da hızlı getirdilӓr pek lääzımnı bu yardımı. Doni bulü umut eder, ani onu kullanarak çıkarabilcek kocasını dışarı, çünkü o sade evin içindӓ durmaya alışmamış hem bütün yaşamasında durmadaan çalıştı, şindi da, saalık problemları olsa da, dışarda bişeylär yapmaa isteer.
Источник anasozu.com
