Gagauziyanın çiftçileri buluştular çiftçi ministrusunnan
Gagauziyanın çiftçileri buluştular Moldovanın çiftçi ministrusunnan Vladimir Boläylan. Toplantına kaldırıldı hepsi soruşlar Gagauziyanın çiftçi çorbacılıkları için.
Gagauziyanın tarlalarında toplandı bir sıra problema, kendi sözündä açıkladı Gagauziyanın Başkanı İrina Vlah.Var dertlär baalı transportlan logistikaylan, kredit proţentları da üüseldi hem başka soruşlar. Ama en büük problema oldu kuraklık.
İRİNA VLAH, Gagauziyanın Başkanı: “Bän açıkladım bir sıra prblemaları, angılarını mutlaka lääzım çözelim. Hükümet mutlaka kabletsin çözümneri, angıları durumu doorudaceklar avtonomiyada. Hepsi soruşları çözmää lääzım, ki eksport gitsin, logistika çıkarsın malları günduusu tarafına”.
Gagauziyanın çiftçi bakanı Andrey Dimitroglo haberledi hepsini, ani avtonomiyanın başarıldı ekin biçilmesi. Söleyeräk sayılar için, çiftçi bakanı nışannadı, ani buyıl bereket bitki 10 yılın çıkışlarına görä pek eksik.
ANDREY DİMİTROGLO, Gagauziyanın çiftçi bakanı: “Ama hep okadar isterim sölemää, ani bereket eksik sa da, hep okadar Gagauziyada var ekin imäk hem satmak için da.Var tenelär ekmäk için 10 bin ton aartırıldı”.
Moldovanın çiftçi ministrusu Vladimir Bolä nışannadı, ani görevenä girdikçä kurdu bir sıra ölçüleri, ki yardım etmää çiftçilerä. Onnarın arasında bankların öndercilerinnän buluşmak, importörlarlan sözleşmelär hem çiftçilik ministerliin temsilcileri.
VLADİMİR BOLÄ, Moldovanın çiftçi ministrusu: “ Hepsi bu 3 kararı kablettik, ki teklifleri kurmaa. Bän eminim, ani Hükümedin fikirleri tutturulaceklar da devlet uurundan yardımları Gagauziyanın çiftçileri kabledeceklär”.
Toplantının sonunda çiftçilär soruşlarını açıkladılar Moldovanın ministrusuna.
Источник grt.md
