Gagauziyanın başkanı çiftçilärlän buluşup kırlarda bereket için prognozları üürendi
Yakınnarda büük çiftçi kurumnarı bereketin ilk gruppasını toplamaa başaraceklar. Bu yıl ekinnän ekili 34 bin ektardan zeedä, orta bereket kurȇr 23-25 ţentner. Nicä giderlär işlär kırda, üürendi bizim korrespondent.
Bu yılın kuraklıı belli etti kendisini berekettä nicä ilk gruppada, ölä da ikincidä. Erlem aaraştırıp geçän yıllan, bereket bir — iki keredä iisik, ama taa ii 2020 yıla bakarak. Nicä söledi Komrat kasabasının çiftçi çorbacılıın başı Semön Novak, bakmadaan zorluklara hem kuraklık yıla, insan ekmeksiz kalmayacek, kvotçiklärlän da ödeşeceklär. Ama şindi koyȇrlar hepsi kuvedini ki toplamaa bereketi ambarlara.
Şindän sora başarȇrlar toplamaa ekini taa bir çorbacılıkta Kiriet — Lunga küüyüdä, neredä orta bereket kurȇr üç ton ektardan. Eni tehnika hem kombaynalar vererlär kolaylık kayıpsız hem vakıtçasına biçmää bodayı hem sürmää topraa. Bakmadaan problemalara, kurumun başı İvan Ülarjı nışannadı, ani kırlar sürünecek hem ekilecek, insannara da verilecek boday hem semiçka, papşoy var nicä olmasın.
Petrol malların, beslemäk materialların paalılanması hem bereketin ücüz paası belli edecek kendisini çiftçilik bölümündä. Da nicä sölerlär agrariyalar, regional hem devlet kuvetleri lääzım esaba alsınnar onnarı da savaşsınnar çözmää bu problemaları.
Gagauziyanın başkanı irina Vlah nışannadı, ani kötü durum baalı diil onunnan, ani bizim çiftçilär bilmeerlär nicä işlemää yada diildilär hazır ekmäk kampaniyasına, ama kuraklık, petrol malların paalılanması buna sebep oldu. Başkan hep ölä urguladı, ani danışacek eni çiftçilik ministrusuna Vladimir Boläyä, ki gelsin regiona da buluşsun agrariyalarlan ki belli etmää, nicä onnara yardım etmää.
Erlem bodayların ilk gruppası alıp güzün hem ilkyazın nemniini çıktılar da verdilär ko diil büük, ama bereket, ikinci gruppa gösterer küçük sayıları. Semiçka 1-1,5 ton ektardan, papşoy var nicä hiç olmasın kuraklıın beterinä.
Источник grt.md 12.07.2022