Gagauziyada ekin berekedi eterli, bakmayarak ani yıl kuraklı
Gagauaziyada başardılar topamaa güzlüklerin berekedini. Bakmayarak kuraklık vakıdına, ekin malları avtonomiyada etişecek gelän yılı geçirmää deyni. Teneleri aartıraceklar ekmäk için, hem vermää deyni kvotacılara da. Ama nicä haberledi Gagauziyanın çiftçi bakanı Andrey Dimitroglo, biraz zor olacek onun satması. Bu hem başka zorladılmış soruşları onnar hazırladılar, ki açıklamaa Çiftçi ministrusunnan harman ayın 4-dä Vladimir Boläylan.
Olsun deyni aartırılmış güzlüklär ekmäk hem imäk için, Moldova lääzım çözsün soruşlarını baalı êksportlan. Bu konuları onnar açıklayaceklar gelän aftaya Moldovanın çiftçi ministrusunnan Vladimir Boläylan. Çiftçi bakanı belli etti çıkışları güzlüklerin berekedi için.
ANDREY DİMİTROGLO, Gagauziyanın çiftçi bakanı: “Bu yılkı bereket taa ekesik nekadar önce yıllar. Hepsinin kabaatı oldu kuraklık, ama imelik hem ekimlik tenä etişecek. Büün artık biçildi 96 bin ton güzlüklerdän. Ekinin sayısı kurdu -276 bin 200 ton, onnardan ekmäk için alındı 10 bin ton, biraz taa zeeda 15 bin tondan verilecek kvotacılara, artık daadêrlar. Hepsi çiftçilerä verildi izin ödeşsinnär insannan, ne bakılı annaşmalarında. Hep ölä verildi tenelär Gagauziyanın ekmek pişirän fabrikalara da, ne kurdu 5 bin ton, yakın 7-8 bin tona verilecek hayvannara em için. Hepsi harçlar kuraceklar 36-40 bin ton, kalanı lääzım satılsın aşırıya, ki olsun kolaylık satın almaa ilaçları hem yakacakları çiftçilerä”.
Ama nicä söledi çiftçi bakanı satmaa berekedi zor, çünkü Ukraina devleti çıkarêr satılaa mallarını hem limannardan, neredän Moldova geçirärdi.
ANDREY DİMİTROGLO, Gagauziyanın çiftçi bakanı: “Ekinin paası Ukrainada biraz taa ucuz. Bizdän satın alannar, başladılar almaa malları onnardan. Da biz çok sefer işideriz, ani Moldovada olmayacek eksport, çünkü kalmayacek imelik tenä, ama diil aslı haberlär, çünkü var ekimlik, imelik hem satılık ta”.
Ama ikinci berekedin beklemeri pek kötü, nışannadı çifttçi bakanı.
ANDREY DİMİTROGLO, Gagauziyanın çiftçi bakanı: “Papioy hem semeçka kötü durumda kuraklık beterinä, papşioydan 85-90% kayıp olacek, semeçka taa ii durumda, çünkü kuraklaa dayanêr”.
Gagauziyanın çiftçi bakanı Andrey Dimitroglo nışannadı, ani satmak soruşu lääzım açıklansın hem kaldırılsın Hükümedin uurunda, da orada barabar Gagauziyanın kuvetleri mutlaka çözsünnär alış-veriş problemalarını.
Источник grt.md 03.08.2022