Gagauziyada Ukrainadan gelän insannar kablederlär hertürlü yardım
Ukrainada asker olayların başlamasının beterinä binnärlän insan komuşu devletindän geler Moldovaya. Nicä bütün respublikada, ölä Gagauziyada da cenktän kaçannar kablederär hertürlü yardımı.
Gagauziyanın yaşayannarı kalmadılar bir tarafta da karşıladılar Ukrainadan gelenneri yardımnarlan. Avtonomiyada bu insannar için birkaç maasuz merkezdä yardım veriler. Onnarın birisi Komratta bulunȇr.
ALEKSANDR KARAÇLI Komrat kasabasının primar yardımcısı: “Kasabanın kultura evindä biz kurduk bir merkez, neredä biz informaţiya vereriz. Telefon kompaniyaları verdilär bizä sım — kartaları, angıların yardımınnan gelennär var nicä telefon açsınnar Ukrainada kalmış senselelerinä”.
Bu merkezdän kaarä, kasabanın primariyasında bu insannar için toplanılȇr hertürlü yardım.
OLGA PATUTİNA Komrat primariyasının cümnä bülümün öndercisi: “Gelerlär 9, 10 kişiyä kadar aylelär. Kimä sabun lääzım, kimä peşkir silinmää, kimä ilaç. Sevindirer, ani bizim insannarımız annȇȇrlar, da yardımnan gelerlär. Bu insannara büün en zor”.
Albina Moldovaya geldi Odesa bölgesindän iki küçük oolunnan. Annadȇrlar, ani vakıdında Ukrainadan gittilär.
ALBİNA Ukraina vatandaşı: “Biz İzmaildan geldik. Dün etiştirdik çıkmaa Ukraindan, büün sä bizdä kurşunlamaa başladılar dolayları. Biz bulduk er kendimizä, ama geldik burayı beki yardım edeceklär. Bizä lääzım yorgan, yastık. Saa olsunnar yaşayannar, ani kablederlär bizi. Şükür ederiz herbirini”.
ANDREY Albinanın oolu, Ukraina vatandaşı: “Biz, açan kararladık Ukrainadan çıkmaa, orada hepsi usluydu. Bän özledim evi hem senseleleri”.
Gagauziyanın kimi kasabalarında hem küülerindä büün işleerlär Ukrainadan gelenneri kabletmäk merkezleri. Onnardan biri Kongazda.
İVAN KOLİONGLO Gagauziyanın Hatalı Olaylarında komisiyasının başı:“Kongazda var nicä kalsın 100 kişi. İnsannara veriler imek, ruba, onnara deyni yapıldılar hepsi koşullar. Herersi sıcak. Bölä merkezlär var Kıpçakta, Kazayakta, Valkaneştä hem Çadırda”.
Gagauziyanın yaşayannarı büük saygıylan danışȇrlar Ukrainalıların kahırına.
İVAN KOLİONGLO Gagauziyanın Hatalı Olaylarında komisiyasının başı: “Gururluyum onunnan, ani bizim yaşayannarımız pek sıcak kablederlär bu insannarı. Pek aktiv bu iştä gençlär, angıları pek çabuk herbir işi yapȇrlar. Topladılar malları, ruba, ilaç hem başka önemli tertipleri. Kablettilär insannarı evlerindä”.
Başlayarak küçük ayın 24-dän, Ukrainadan Moldovaya girdi 108 bin insandan zeedä.
Источник grt.md
