Gagauziyada 2022 çeketmesindän beeri sayıya koyuldu 19 yolrazgelmesi
Gagauziya Poliţiya bakannıın bilgilerinä görä, avtonomiyada 2022 çeketmesindän beeri sayıya koyuldu 19 yolrazgelmesi. Hep okadar olay yolda razgeldi geçmiş yılda.
Butakım, bu yılın çeketmesindän Komrat dolayinda sayiyä koyuldu 3 yolrazgelmesi (2021 — 6); Çadır dolayında — 12 (2021 – 8); Valkaneş dolayinda – 4 (2021 – 5).
2022 yılın başından bu yana kadar Komrat – Çadır bölgesindä yol durumunu kontrol edän polis izmeti nışannȇȇr, ani üç yolrazgelmesi baalı yayan gezän insannarın yaralanmasınnan. Yol razgelmelerin sönücünda geçindi bir insan, iki olayda insannar yaralandı. Hepsi yol razgelmelerindä kaabaatlı oldular nicä araba kullanıcıları, ölä da yayan gezennär.
“Bir olayda araba kullanıcısı kolvermedi yayan gezän insanı, ikisndä dä insannar geçärdilär yolu, neredä yoktu zebra”, — açıkladı Komrat — Çadır patrul izmetin ofiţerı Andrey Dimitroglo.
Dün Komratta oldu yol razgelmesi, angısında yaralandı uşak 11 yaşında.
«Uşak geçärdi yolu yannış erdä, karşı gelän Opel markalı araba da urdu onu. Arabayı kullanardı 18 yaşını tamannamamış yaşayan, angısının şoförlük kimlii yok. O vakıdında görämedi yolu geçän uşaa. Sonuçta yaralanmış uşak alındı Komrat bolniţasına komada”, — annattı polis uzmanı.
Moldova poliţiya izmetin zaametçileri nasaat ederlär araba kullanıcılarına hem insannara dikkatlı bakmaa yol kurallarını.
“Nasaat ederiz araba kullanıcılarına vermää vakıt yayan gezän insannar etiştirsinär geçmää yolu. Yayan gezenneri dä çaarerız geçmää yolu sade lääzımnı erlerdä, bakmaa semafora da eşil şafk yanınca geçmää yolu. Hep ölä danışȇrız analara-bobalara hem üüredicilerä üüretsinnär uşakları dooru geçmää yolu”, — söledi patrul izmetin ofiţerı Andrey Dimitroglo.
Moldova devletin kanonuna görä transport kullanıcısı, angısı kolvermedi yayan gezän insanı, cezalanȇr ştraflan. Erlem kanona karşı gidärsa insan, o da cezalanacek. Erlem olarsa yol razgelmesi neredä öldü insan, ozaman taa büük cezalar bekler kabaatlıyı.
Источник grt.md 22.04.2022