Moldovada “Peşehod” kampaniyası geçer
Moldovada Büük (yanvar) ayın 9-dan — 26-dan «Peşehod» (yayan gezän insan) operaţıyası geçer. Onun neeti yol razgelmelerini durgutmaa. Geçmiş yıl respublikanın üülen tarafında 61 yol razgelmesi oldu, onnarda 12 kişi geçindi, 55 yaralandı.
«Yug» yol poliţiyasının uzmannarı nışannȇȇrlar, ani yol razgelmelerini yok etmää deyni kuralları herbir insan esaba lääzım alsın. Araba kullanıcılarına nasaat ederlär dikkatlı olmaa yolda, malez okulların hem yaslaların yannarında.
«Bu operaţıyanın daavası — yol razgelmelerini iisiltmää, neçinki devlettä olan yol razgelmesi taa çok yayan gezän insannarlan baalı», — açıkladı Çadır-Lunga «Yug» patrulün ofiţerı İvan Jeçkov.
Yayan gezän insannar lääzım aklında tutsunnar, ani yolu aykırlarkana kuralları esaba almarsaydılar, var nicä ölsünär. Onuştan yolu geçärkänä yayan gezennär lääzım emin olsunnar, ani araba yavaşıdı ya da durgundu.
«Yayan gezennär dä düşünüptä yolu geçsinnär lääzım. Arabacıda herzaman yok ölä kolaylık hızlı durgutmaa maşınayı».
«Bän kanona karşı gitmeerim. Hepsi yol kurallarını esaba alȇrım. 15 yıldan zeedä arabayı kullanȇrım».
Poliţiya uzmannarı nışannȇȇrlar, ani araba kullanıcıları yaklaşarkana yolu aykırlamaa bekleyän insana lääzım ona yol versinnär. Sade “Zebra” yolu geçmää deyni dooru er hem küçüklär, hem büüklär için.
«Bän herzaman dooru erdän yolu geçerim. Hiç bir zaman arabacılara köstek olmȇȇrım. Kanona görä yaşȇȇrım».
«Siirek kanona karşı giderim. Yolu geçärkana iki tarafa da bakȇrım, ama kimär keret alatlȇȇrım».
Moldovanın kanonnarına görä te onnar, kim yayan gezän kişiyi kolvermedi, var nicä cezalasın paraylan 900 leydän 1500 leyädän hem 4 ceza puanını kableder. Er yayan gezän kişi kanona karşı gittisaydı, o 300 ley cezä ödeer. Geçmiş yıl devletin üülen tarafında 163 protokol yazıldı,onnarın arasında 988 yayan gezän kişilär cezalandı.
Источник grt.md
