Gagauziya başkanı karşı çıktı Moldovada altı TV kanalın yayın durgudulması için karara
Kıran ayın 19 – da Moldova devletin altı kanalın durguduldu yayın liţenziyaları. Bölä kararı kabletti hatalı olaylarında Millet komisiyası. Bir vakıda kanalların kapadılması için kararı yannış buldular nicä jurnalistlär, ölä da çoyu politiklär.
Geçän afta hatalı olaylarında Millet komisiyası çikardı karar altı telvizion kanalın yayın liţenziyalarını durgudulsun. Onnar: TV6, Orhei TV, Primul ın Moldova, Accent TV, NTV Moldova hem RTR Moldova. Komisiyanın kararına görä, bu iş yapıldı deyni «korumaa haber ortalıynı, engelemää cümneya yapılan manipuläţiyaları hem dezinformaţiya riskini azaltmaa».
Bir vakıda altı kanalın kapanması yapıldı Radio hem Televizion Sovetin çikışlarına görä, haberledi Moldova devletin prezidenti Maya Sandu. Onnarda açik söleniler, ani bu kanalların redakţiyaları vermäzdilär dooru haberleri durum için Moldovada hem da cenk için Ukrainada.
«Bizim daavamız — korumaa usluluu Moldova devletindä zor koşularda, angılaırnda biz bulunȇrız, bu sayıda haberlär cenk için ani gider Moldovanın sınırıda. Korumaa haber ortalıynı — önemli adım ki durgutmaa ortalıın karştırılmasını, angılarını çekettirdilär kişilär, kim bulunȇr halklararası sankţiya altında”, — yazdı kendi Facebook sayfasında Maya Sandu.
Moldova devletin başbakanı Natalya Gavriliţa sayȇr, ani o vakıt, açän bizim devlettä gider ȇnergetika hem informaţiya cengi, hükümetä bişey kalmȇȇr, nicä bölä korumaa vatandaşları.
«Şindän sora 300 gün nicä cenk gider Ukrainada, Moldovada propaganda durgunmadı, ama zeedelendi. Durumda, angısı karşı gider diil sade ȇnergetika hem da informaţiya cengi, bizim borcumuz hem da sorumnuumuz – korumaa yaşayanarı hem da memleketi”, — yazdı Natalya Gavriliţa kendi Facebook sayfasında.
Kararı yayın liţenziyaları durgutmak için diil dooru buldular avtonomiyada da. Gagauziyanın Başkanı İrina Vlah yazdı bir video, angısında açıkladı fikirini, ani Moldova hükümeti devlettä hepsini baskı altına alȇr giriştireräk avtoritar rejımını. Başkanın laflarına görä “presa o en bitki düşman, angısınnan lääzım güreşsın demokratiyalı hükümet. Bakmadan buna, bizim devlettä hepsi yannış olȇr”, söledi gagauz avtonomiyasının başı.
«Sayerım, ani altı kanalın yayın liţenziyaların durgudulması–korkunç bir olay demokratiya devleti için, lafın serbestlii için hem da bakışların plüralism için. Moldova önderciliindä duran partiya şüpä altına koyȇr bizim bakışlarımızı, becerikliimizi düşünmää, ayrmaa biyazı karadan. Bundan karä, olannar gösterer, ani opoziţiyanın sesi hem da kuvetlärlän kayıl olmayannarın sesşleri başka ötmeyecek yayında», — söledi Gagauziya başkanı.
Kanalların kapadılması için kararınnan kayıl olmadıklarını gçsterdilär jurnalistlär dä. Moldova devleti baamsız presasının uzmannarı saȇrlar, ani kuvetlär lääzımdı açıklasınnar derindän aslı hem üridik koşularını.
Moldova Hatalı olylarında komisiyasının kararınnan kayıl olmadılar sınır aşırıda da. Rusiya devletin jurnalistlerin Birlii neetlener danışmaa hepsi halklararası kurumnarına. Orada haberledilär, anı bir vakıda altı kanalın kapadılması, angılarında gösterilärdilär rus dilindä programaları, bu büük bir kötülük Moldovada rus dilindä lafedän insannar için.
Tekst: M. Statova, P. Barbova, video: G. Stavilov, V. Tabaçuk, montaj:A. Topal
Источник grt.md
