Yader bombanın patlamasından zararlanmayı azaltmak için hükümet korunmak ölçülerini işleder
Moldova devletin hükümeti kararladı kanon proektini, angısı belli eder nicä yaşayannar yader bombanın patlamasından yada radiologiya uurunda avariyalardan kendini korusunnar. Kabledilmiş hükümetlän kanon proekti radiologiya uurunda korunmak için yollandırılacek Parlamenta güz – kış sesiyasında bakılmak için. Bakarak kanon proektinä, herlim yader yada radiologiya uurunda avariyalar olarsa, yaşayannar lääzım bilsinnär nicä kendilerini korumaa.
Rumıniya devleti yardım olarak verdi Moldova devletinä bir milliondan zeedä yodlan kaliy ilacını. Onnarı kabletti Millet cümnä Saalıı – Korumak Agentstvosu, da daadılacek dolay bölümnerinä. Ondan sora onnarı kabledeceklär dolaydakı saalık merkezleri, Hatalı olayların komisiyasının kararına görä.
SERJIU GERÇİY, Moldova devletin tabiat ministerliin devlet sekretari: «Bu dokumenttä kanona görä belli olacek, nicä korunmaa yader bombanın patlamasında. Angısı var nasıl belli etsin yaşayannarın saalıklarında. Bu yapılȇr onun için, ki korumaa vatandaşları hem da iisiltmää insannarın sayısını zararlardan. Açan işlettirärdilär bu dokumenti, belli olmadılar kötü işlär, ama var nasıl belli olsunnar diil islää ȇfektlar. Kanon proektinä lääzım yaklaşmaa pek cuvaplı».
NATALYA GAVRİLİŢA, Moldova devletin premyer – ministrusu: «Bu proekt şindän sora çoktan işlettirildi, da koyuldu hükümetin planına taa mandatımızın çeketmesindän beeri».
Millet cümnä Saalıı – Korumak Agentstvosunun uzmannarı işlettirdilär instrukţiyayı kullanmak için yodlan kaliy kopçalarını, angısında söleniler:
- Kopçalar yodlan yapılı kullanmak için insannarlan, neredä yakın bulunȇr yader reaktoru, yada başka erlerdä, neredä var nasıl olsunnar yader bombaların patlamakları.
- Yodlan kaliy kopçaları bulunȇrlar kutularda, da herbir kutuda var instrukţiya, angısını lääzım mutlaka okumaa, kullanmamamaa deyni taa zeedä.
- Kullanmaa yodlan kaliy kopçalarını diil lääzım sebepsiz, bu var nasıl getirsin taa zeedä zarar, nekadar fayda.
- İlk yodlan kaliy kopçalarını lääzım kullansınnar o insannar, angıları bulunȇrlar yakın yader bombaların avariyalarından, radioaktiv yodun patlamasından, bu sayılȇr bir en ȇfektiv korunmak.
Millet cümnä saalıı korumak Agentstvosunun uzmannarı haberleerlär, ani şindiki zamannar yodlan kaliy kopçalarını diil lääzım kullanmaa. Buna yok sebep.
prevyu: newsmd.md
Источник grt.md
