Gagauziya deputatları Moldovada altı rus kanalın kapadılmasını yannış gördülär
Gagauziya Halk Topluşunun (GHT) kimi deputatları maana buldular Moldova Hatalı olaylarda komisiyasının kararına, angısına görä altı telekanalın işi durguduldu. Bunu onnar maasuz brifingta açıkladılar.
Moldovada hatalı olaylar durumun vakıdına respublikada durguduldu altı kanalın yayını: Primul în Moldova, TV-6, Orhei TB, Accent TV, NTV Moldova, RTR Moldova.
GHT deputatı Elena Ürçenko nışannadı, ani yaşayannar çok sıra danışȇrlar hem kendi bakışlarını açıklȇȇrlar rus dilindä yayınını yapan kanalların kapanması için.
“Bu kanalların kapanması nışannȇȇr onu, ani Gagauziyanın hem Moldovanın 100-lärlän yaşayanı kalaceklar informaţiyasız”, — söledi Elena Ürçenko.
GHT deputatı İvan Dimitroglo nışannadı, ani Gagauziyada büün çalışȇr 3 ofiţial dil, da Hatalı olaylar komisiyasının kararı karşı gider rus dilindä lafedän insannarın haklarına.
“Çok lafederlär demokratiya için hem laf serbestlii için. Biz ama göreriz, nicä devlet kuvetleri totalitar rejiminä geçtilär. Bütün devlettä diktatura”, — söledi İvan Dimitroglo.
Deputat Mihail Popov çizgiledi, ani yayınnarın zapedilmesi baalı “bu ekranardan gelän aslı informaţiyasınınnan”.
“Onnar göstererlär fukaarelii hem nesoy götürerlär kendilerini kuvettä bulunannar. Elbetki, öndercilär bunu sevmeerlär. Hepsi kim onnarlan diil kayıl, baskı altına düşer”, — söledi Mihail Popov.
Büünkü kuvetlär zapederlär yaşayannarda patriotizm duygularını terbiedän işleri, nışannadı HT deputatı Leonid Kösä.
“En ilkin onnar zapettilär sovet filmnerini, rus haber portallarını, hem Georgievskiy şiridini. Hepsi bunnar yaşayannarda sevgi Vatanına terbiedärdi”,- söledi Leonid Kösä.
Halk Topluşunun deputatları açıkladılar kendi bakışını, ani halklararası uurunda da bu kararınnan lääzım kayıl olmasınnar.
Источник grt.md
