Caltay küüyündä sokak şafları hererdä var
Birkaç yıl geeri Gagauziyanın Halk Topluşu kabletti “Aydın küü” programasını. Ona görä avtonomiyanın küüyleri hem kasabaları gecä vakıdı aydınnadılardılar. İşleer mi bu programa büün hem var mı gecä şafk Caltay küüyündä, annadı korrespondentımız Alöna Terzi.
Büünkü gündä Caltay küüyün herbir maalesindä gecä şafklar yanȇrlar. 4 yıl geeri bütün küüyün uzunnuuna 16 km gecä şafkı telleri geçirildilär. Bundan kaarä diiştirildilär aydınnatmak için eni lampalar da.
İLYA KOŞULİNSKİY Caltay küüyünün primarı: “4 yıl geeri biz bütün küüyä şafkları geçirdik. Şafk büün herbir maaledä var. Koyduk 250 lampa. Şafklar tutuşȇrlar avşamneen karannık olduynan taa beşädän sabaaylen. 2 yıl geeri para bu uura deyni “Aydın küü” programasından gelärdi, bu yıl sa kendi bücetimizdän bu uura finans vereriz. Para büünkü gündä eter, ama kalkarsa paalar şafka , bilmeerim ne yapacȇz ötää dooru”.
Yaşayannar nışannȇȇrlar, ani gecä vakıdında, şafkların peydalanmasınnan, taa kolay oldu çıkmaa dışarı hem korkusuz sokaklarda gezmää.
“Bütün gecä şafklar yanȇrlar. ”
“Yanȇrlar pek islää, gecä nicä gündüz. Hiç problema bu uurda yok. Benzämeer, nicä ilerdän köstekleneräk orayı, köstekleneräk burayı gezärdik. 3 yıl geeri eni lampaları koydular, ama şafk küüydä var bir sekiz yıl. Bu eni şafklarlan pek aydınnık gecä”.
“Birkaç yıl oldu, nicä şafklar gecä var”.
Caltay küüyünün sokaklarında gecä aydınnatması için her yıl 100 bin leyä yakın harcanȇr.
Источник grt.md
