Kongazda Ukraina vatandaşlarını kabledän merkezin aşçılarını şükür ettilär işi için
Kongaz küüyünün merkezindä, neredä büün kablederlär Ukrainadan gelän insannarı, volontörlar işleerlär. Aftadan zeedä bu insannara deyni hepsi koşullar kurulȇrlar. Kurumda çalışan aşçıları onnarın işi için şükür etti Devlet konţeläriyası teritorial büronun öndercisi.
Aftadan zeedä Kongaz küüyünün merkezindä, neredä kablederlär Ukrainadan gelän insannarı, saymadaan zaametini, gecä-gündüz 24 saat aşçılar işleerlär. Birkaç sıra gündä haşlak imäk Ukrainadan gelän insannara deyni hazırlȇȇrlar. Onnarın işi için şükür etti Devlet konţeläriyası teritorial büronun öndercisi Genadiy Kazanci.
GENADİY KAZANCİ, Devlet konţeläriyası teritorial büronun öndercisi: “Saygılı karılar, Devlet konţeläriyası teritorial büronun hem Moldovanın Hükümeti adından isteerim şükür etmää sizi bu iş için. Siz saymȇȇrsınız zaametinizi da Ukraina vatandaşları için işleersiniz. İşinizin paası yok”.
Taa ilk gündän burada KristinaTatar işleer. O annadȇr, ani her gün insannara yardım etmää savaşȇrlar.
KRİSTİNA TATAR, aşçı: “Biz burada 4 kişi işleeriz. İnsannar pek şükür ederlär. Var bizdä bir tefter, orada metederlär bizi hem şükürlük laflarını yazȇrlar”.
Aşçıykaların biri Kiräkiyä Kostanda nışannadı, ani insannar yardım etmää da savaşȇrlar onnara.
KİRÄKİYÄ KOSTANDA, aşçı: “Savaşȇrlar yardım etmää, toplȇȇrlar ardlarına sofrayı. Bizä deyni bu bir yardım. Önemli, ani onnar bizim sıcaklıımızı duysunnar”.
Kongaz küüyünün Ukrainadan gelennär için merkezin imekleri pişirmäk odası gecä — gündüz işleer. İnsannara deyni burada 4 sıra gündä imeklär hazırlanȇrlar.
Источник grt.md 10.03.2022