400 yakın Gagauziyanın okulcusu payladılar ilin atletika spartakiadada
Geçän dinnenmäk günnerindä Komrat stadionunda geçti ilin atletikada spartakiada üürenicilerin aralarında. Onda pay aldılar yakın 400 üürenici, regionun hepsi üürenmäk kurumnarından. Liţeyların aralarında ilk eri kazandı kıpçak Baranovskiy adına üürenmäk kurumun komandası, ikinci oldular uşaklar Tuzlov adına liţeyından, hem üçüncü Moşkovun adına liţeyindän Çadırdan. Gimnaziyaların aralarında erlär pay oldular butakım: Tomay ilk erdä, ikinci Rudenko adına okulu Vaklaneştän hem Kazmalı adına gimnaziya Çadırdan.
Cümertesi günü Komratta hava bulutluydu, serindi hem lüzgärlıydı, ama bu kösteklämedi yarışmakların geçirilmesini. Uşaklar orta hem liţey klaslarından yarıştılar kaçmaklarda 60, 100, 500 metraya hem estafetada 4 100 metraya, hep ölä gösterdilär üüsek çıkışları taramakta hem topun atmasında. Bu gün çoyu koydu kendi rekordunu, kimä sä uymadı çıkmaa tarayıcıların aralarına. Üürenicilär nışannadılar, ani bölä oluşları lääzım geçirmää taa sık hem taa sıcak havada.
Spartakiadanın açılışında uşaklara danıştı gençlik hem sport bakanı Sergey Stoyanoglo hem üüretim bakannıın uzmanı Evgeniya Tomaylı. Onnar nışannadılar, ani bölä yarışmaklar yardım edeceklär belli etmää en talantlı uşakları hem götürmää saalıklı yaşamayı.
Fizkultura üüredicileri tutturdular kendi komandalarını. Onnar nışannadılar, ani bölä oluşlar diil sade birleştirerlär komandaları hem yardım ederlär fizik tarafından kaavilettirmää saalıı, ama dostlaşmaa da.
Yarışmakların baş daavacısı hem Kirsovo küüyün Tuzlova adına gimnaziyasının üüredicisi Hristofor Vidov nışannadı, ani yarışmaklar geçtilär üüsek uurda, da bakmadaan suuk havaya, hepsi başardılar koyulmuş davaaları.
Uşaklar, angıları kazandılar ilk erleri, kablettilär üüretim bakannıından baaşışları, diplomnarı. Yarışmakların sonunda belli edildi üç en klaavi komanda, angıları kablettilär kubokları.
Reportör: Zinaida Kanţır
Video: Vlad Tabaçuk
Kurgu: Aleksey Gerçu
Источник grt.md
