Gagauziya dzüdo açık çempionatı topladı Moldovanın en kaavi sportçularını
Geçän dinnenmäk günnerindä Komratta Gagauziyanın regional sport liţeyindä geçti dzüdo açık çempionatı. O topladı Moldovanın 9 en kaavi komandasını. Yarışmaklar geçtilär türlü aarlık kategoriyalarında. Avtonomiyadan çempionatta pay aldılar sportçular Komrattan, Kazayaktan, Valkaneştän, Çeşmä küüyüdän.
Gagauziyanın dzüdo açık çempionatı geçti Komrat sport liţeyındä. Güreşlär geçtilär iki matta. Onnar topladılar devletin en kaavi dzüdocülarını. Kızgınnık duyulardı bütündän. Kimisi istemäzdi gitmää taradılmış. Ama sport olä: var taramaklar da, taratmaklar da. Çempion oldular nicä en küçüklär, ölä dä te onnar, kim diil bir keret kalktılar devlet hem Evropa yarışmakların şannı pyedestallarına.
“Konkurentım taa yufkaydı bendän, ama hepsi ii geçti”.
“ Bän beendim nicä geçti yarışmaklar. Zordu, ama bän yaptım ne koydum neetimä”.
“Bän sevinerim, ani taradım ikinci eri, ileri dooru hazırlanacam gelecek yarışmaklarına”.
Tutturardılar sportçuları onnarın trenerları, angıları koydular bütün kuvedini, ki maasus bölä çempionatlarda belli etmää en kaavileri, yapmaa analiz, ne taa lääzım kaavileştirmää. Bu yarışmaklar verelär kolaylık kaldırmaa kendi ustalıını sport uurunda.
“Güreş gider diil şaka, kaavi konkurenţiya Komrat dzüdoistlerinä”, — nışannadı Belţı kasabasının dzüdo trenerı Gennadiy Milişkeviç.
Yarışmakların baş daavacısı urguladı, ani çempionat hazırlandı üüsek uurda. O topladı en kaavi sportçulları. Onnar gösterdilär kaavi hem meraklı güreşleri, ne gösterer, ani devlettä dzüdo ilerleer. Pötr Kurunun terbiedilenneri sıkı hazırlandılar da başarabildilär koyulmuş davaaları.
“Neredä bän düşündüm, ani tarayaceklar benim çocuklarım, birazı taradı, birazı tarattı. Ama güreşlär kızgındı hepsi aarlık kategoriyalarında. Pek kaavi komandaları getirdilär Tiraspol, Belţı, Benderı”, — söledi Pötr Kuru.
Tutturmaa spotçuları hem vermää baaşışları geldilär sport hem gençlik bakanıın başı hem “Judo junior Moldova” cümnä topluluun temsilcisi. Mussafirlerin bakışlarına görä matta güreş sıkıydı hem becerikliydi, ama sadece karakter yardım eder taramaa.
“Maasus sayȇrım, ani bölä yarışmaklar ilerlederlär sportu Moldovada. Bizim uşaklar isteerlär hem var nicä etişsinnär üüsek çıkışlara”, — nışannadı “Judo junior Moldova” cümnä toplumun temsilcisi Grigoriy Moga.
Yarışmakların çıkışlarına görä 30 uşak kazandılar üçüncü erleri, 30 da ilk hem ikinci erleri. Hepsi tarayıcılar kablettilär para baaşışlarını, diplomnarı, çempionnar da kubokları. Komandaların aralarında erlär pay edildi butakım: ilk oldu Komrat, ikinci — Kazayak hem üçüncü — Kalaraş. Onnara verildi kubok hem baaşışlar — top hem kimono.
Источник grt.md
