Gagauziya hem Tiraspol komandaları buluştular Komratta voleybol turnirindä
Geçän dinnenmäk günnerindä Komrat gençlik merkezindä geçti voleybol turniri. Onda pay aldılar beş komanda Gagauziyadan hem voleybolistlär Tiraspol kasabasından. İdeyäylan geçirmää turnırı çıktılar Kirsovo küüyün komandası hem küüyün yaşayanı Olga Sukman.
Turnirdä pay aldılar komandalar Komrattan, Tiraspoldan, Tomay, Avdarma hem Kirsovo küülerindän. Turnirın hazırlayıcısı Olga Sukman urguladı, ani ideyä geçirmää yarışmakları peydalandı ondan sora, nicä bir- iki keret oynadılar bu komandalarlan türlü erlerdä da kararladılar tutturmaa saalıklı yaşamayı geçirip bu turnirı.
“Oynadık bir sıra da bän gördüm, ani onnar isteerlär oynamaa, hem belli etmää en ii komandaları. İlk keret pay alȇr Komrattan da komanda, var başkaları da, angıları isteerlär. Da peydalandı ideyä ki kaavileştirmää dostluu hepsinin arasında, bizdä var Tiraspol komandası, o da ilk keret pay alȇr”, — açıkladı Olga Sukman.
Tiraspol komandasının pay alannarı urgladılar, ani yarışmaklar hazırlandı üüsek uurda konkurentlar da kaavi, var kiminnän yarışmaa.
“Pek beendik oynamaa burada komandalarlarlan, pek üüsek uurda oyun. Konkurentlar pek kaavi”.
“Biz geldik Gagauziyaya, oynȇȇrız voleybol, oyun oldu meraklı hem kaavi”.
Matçlar komandaların aralarında kaaviydilär hem kızgındılar. Erli klubların oyuncuları urguladılar, ani konkurentlar hepsi kaavi. Bakmadaan ona, ani oynȇȇrlar bu sport çeşitin sevenneri, oyunnar geçärdilär nicä ofiţial yarışmaklarda.
Gençlik hem sport bakannıın uzmanı Pötr Kuru urguladı, ani onnar büük istemeklän kablettilär teklifi yardım etmää turnirın geçirilmesindä.
“Siz bilersiniz, bän büün sevinerim, ani onda hepsi oldu. Varkana istemäk, hepsi olȇr. Bän sevinerim onun için, ani geldilär Tiraspoldän, Tomay, Avdarma küülerindän, Komrattan, var kim oynasın. Hepsi olacek ii, görerim, ani oyun kaavi”, — nışannadı Pötr Kuru.
İlk eri yarışmaklarda kazandı Kirsovo küüyün komandası, ikinci oldular Tomay voleybolistleri, üçüncü eri kazandı Avdarma klubu. Hepsi tarayıcılara verdilär diplom, ödül hem para baaşışları.
Hep ölä nışannadılar en ii oyuncuları. Onnar arasında Tiraspoldan Bogdan Neftükov hem Ekaterina Kıssa, İvan Kiseev Komrattan hem Nikolay Yazadjı Avdarmadan. Hazırlayıcılar plana koydular bu turnirı her yıl geçirmää.
Источник grt.md 05.07.2022