Üürenmäk kurumnarında üüredicilär etişmeer. Çıkış var mı?
Devletin okullarında hem uşak başçalarında 2 bindän zeedä üüredicilerin hem terbiediedicilerin serbest vakansiyaları var. Bunu üüretim ministerlii haberleer. Bu sayı 200 kişiyä taa çok, nekadar bıldır, açan yakın 1900 üüredici etişmärdi. En çok vakansiya Kişinov kasabasında. Gagauziyada da 146 üüredici lääzım.
Eni üürenmäk yılında taa pek başlayacek duyulmaa üüredicilerin hem terbiedicilerin etişmemezlii. Büünkü gün 2161 uzman lääzım, 186 kişiyä taa çok nekadar bıldırkı yıl. Avtonomiyada 146 üüredici lääzım. 31 kişi açıkladı istemeyi işlemää şkolada. Nicä nışannadı Gagauziya üüretim bakanı Natalya Kristeva, bu sayı yılın çeketmesinädän var nicä diişsin.
NATALYA KRİSTEVA Gagauziya üüretim bakanın başı : -«Bilinmeer hepsi mi onnar okullara etişeceklär. 31 danışmak yazıldı, genç uzmannarı bekleeriz, çoyu onnardan şindän erlerindä bulunȇrlar. Başka danışmaklara cuvap yok, praktikaya görä 100 proţent danışmaya 20-30 proţent cuvap kablederiz. Taa 4 yıl geeri 50 proţendädän cuvap kabledärdik».
Bununnan baalı üüredicilerä, angıları okullarda çalışȇrlar, üürenmäk proţesinä görä taa çok iş geler.
NATALYA KRİSTEVA Gagauziya üüretim bakanın başı : — «Büünkü gün 30 proţent üüredicimizdä bu iş var, angısı taa çok nekadar lääzım standartlara görä. Başka çıkış bu problemadan yok».
Üzmannarın etişmemezlii real bölümün bilimnerindä duyulȇr, paylaştı Natalya Kristeva.
NATALYA KRİSTEVA Gagauziya üüretim bakannın başı: — «En büük defiţit- matematika , fizika üüredicilärlän baalı. Bundan kaarä istoriyada hem başlankı klaslarda üüredici etişmeer. Zorladȇr durumu o da, ani bu predmetlerdä üüredicilerin orta yaşı en üüsek. O pensiyaya yakın pensionerlär, ama onnar hep okadar çalışȇrlar, zerä annȇrlar , ani yok kim diiştirsin onnarı».
Problemanın kararlanılması için avtonomiyada 2 yıl sıradan maasuz programa giriştiriler, urguladı üüretim bakanı.
NATALYA KRİSTEVA Gagauziya üüretim bakannın başı: — «İleri bizim stipendiyalarımız KDU tutturmasına doruduluydu, bıldırkı yıldan kimi diişilmekleri giriştirdik. Laf gider üürenmäk grantlar için, angıların büüklü kontraktın sayısınnan birtürlü, bakmayarak ona student büdjetä ya kontrakta üürener. Biz regional danışmasını giriştireriz da studentlärlän annaşmakları imzalȇrız. Sade bıldır 14 bu takım annaşmak imzaladık».
Annaşmaklar KDU studentlerinnän imzalandılar, angıları yabancı dilleri, istoriya hem muzika zanaatlara üürenerlär. 2 yıldan sora onnarın olacek kolaylıkları praktikayi geçsinär çalışarak üüretim kurumnarında. Bu programayi giriştireräk, üürenmektän sora olabilecek başarannarı okullara işlemää yollamaa. Büünkü gün sistemada 40 proţenttan zeedä 50 yaşından 60 yaşınadan üüredici çalışȇr. Ki genç uzmannar devlettä kalsınar da okullarda çalışmaa istesinär, üüretim ministerlii pedagogika universitetlerin başarannarına ödemekleri zeedeletti. Bundan kaarä çalışmanın 2 yılından sora olabileceklär test versinär, ne 30 proţenda kazanç parasını var nasıl büültsün.
Источник grt.md
