Tülü küün muzeyi kabledecek tedarıkları eksponatları koruması için
Tülü küüyuün muzeyindä yakın zamannarda eni tedarıklar peydalanaceklar. Onnar yardım edeceklär üüsek uurda korumaa ȇksponatları. Tedarıklar alındı Polşa grantından paralara, angısını proektı yazıp taradı muzeyin uzmanı “Cişmeaua Sudului”erideki iniţiativ grupasının yardımınnan.
Muzeydä var birkaç salon, angılarında var resimnär, skemnelär, sofralar, türlü vakıtlardan rubalar, muzika instrumentleri, patretlär, dokumentlär, numizmatika işleri hem başka. Hepsi ȇksponatlar faydalı, istoriyaları baalı küüyun yaşamasınnan. Burada kurulu gagauz köşesi dä, deyni göstermää nasıl halk yaşardı çok yıl geeri, urguladı kurumun uzmanı Sofiya Pançeva.
“Şiindiki bizim uşaklar bilmerlär, nasıl insan yaşardı 18-ci hem 19-cu asirlerdä. Biz onnara annadınca gösterincä, onnar hoşlanȇrlar, nasıl illeri lampaya karşı var nicäydi örüsünnär, diksinnär bölä gözäl işleri”.
Hepsi ȇksponatlar toplu durȇrlar, herbirindä var kendi nomeri. Materilalların zenginniini geniştän yok nasıl göstermää, onuştan da yazıldı maasuz proekt, deyni olsun sergennär ȇksponatların ii erleştirmesi için, nışannadı Sofiya Pançeva.
“Ȇksponatlar bizdä erdä durmasınnar deyni, olsun gözäl, bu proekt giriştiriler. Olsun çok er, kimsey kösteklenmesin erdä bulunan ȇksponatlara. Hepsi onnar sergennerdä duraceklar”.
Küüyun muzeyi anılmış bir er, neredä erideki istoriyayi hem kultura özelliklerinin var nicä üürenmää. Burada sansın vakıt durgundu, herbir ȇksponat istoriyanın meraklı sayfalarını açȇr. Proektın giriştirilmesi yardım edecek muzeyin çalışmasını illerletmää. Olacek kolaylık turistleri da geniştän kabletmää. Sergennerin erleştirmesinin proektın paası 79 bin leydän zeedä kurȇr.
“Mutluyum, ani bu proektı biz taradık. İnsannar da pek yardımcı olmaa isterlär, unukalara deyni bişey kalsın faydalı”.
Tüülü küüyun muzeyi kuruldu 1999 yılda. O zamannardan beeri, kurum toplȇr, kooruyer önemli kultura zenginnikleri. Muzeyin fondunda var 1950 ȇksponattan zeedä.
Источник grt.md
