İon Bass çalgıcının işleri komrattakı muzeyindä olacek
Komrat kasabasının Regional dolay istoriya muzeyin fondları eni eksponatlarlan zenginnendi. Bu günnerdä muzeyä verildilär anılmış türkücünün Bass İonun rubaları hem başka işleri. Bu baaşışı yaptı onun senselesi Elena Nedälkova. O sayȇr, ani bu baaşış verecek kolaylık muzeyin musaafirlerinä taa çok annamaa çalgıcının yaradıcılıı için.
Komrat kasabasının Regional dolay istoriya muzeyin fondlarında büün korunȇrlar unikal eksponatlar, angıları annadȇrlar diil sade dolayımızın istoriyası için, ama anılmış insannarı için dä.
Onnarın birisi Moldovanın anışlmış çalgıcısı İon Bass. Onun senselesi, Başküüyüdä İon Bass adına muzeyin öndercisi Elena Nedälkova seçti karar vermää muzeyä maestrunun kimi rubalarını hem muzika instrumentlerini. O nışannadı, ani bu eksponatlar yardım edeceklär yaşayannara taa derindän üürenmää hem annamaa türkücünün katkısını muzikacılaa.
«Bän seçtim karar vermää muzeyä bir bulgar kostümunu, angısınnnan bän çıktıydım sţenaya, te burada da bir kostümun paraliyası hem gölmää. Burada var onun saatları hem bir akardion, angısında çalardı onun kardaşı da Georgiy Bass. Var burada elektron muzika instrumentleri hem bir dä daul. Bunnar hepsi şindi muzeydä olaceklar», — açıkladı Elena Nedälkova.
İon Bass Moldovanın anılmış türkücüsü. Onun repertuarı pek zengindi gagauz, bulgar hem moldovan muzikasınınnan. Muzeyä verilmiş eksponatlar da korunaceklar hem ileeri dooru andıraceklar maestruyu yaşayannara.
«Herbir eksponat bizä deyni paalı. İon Bass pek anılmış muzikacı hem kultura uzmanı diil sade Moldovada, ama Gagauziyada da. Pek büük bir adam, angısını biz lääzım tutalım aklımızda hem sayalım onunnan kalmış işleri», — söledi Komrat Regional istoriya muzeyin öndercisi Vladislav Marinov.
İon Bas duudu 1933-cü yılda Kirsovo küüyündä. Çok yıl çalıştı MD milli filarmoniyasında. Kendi yaradıcılıınnan andırdı dolayımızı diil sade devlettä, ama bütün dünnedä. O çalardı Moldova filarmoniyasında, «Fliueraş», «Bukuriya», «Мugurel» hem «Folklor» orkestrularda.
Источник grt.md
