Teatr günüdä Gagauz Milli Teatrusu gösterdi kendi ilk spektaklisini
Dionis Tanasoglu adına Gagauz Milli Teatrusu gösterdi «Oglan hem Länka» piyesasını Teatr günündä. Nica kablettilär piyesayı siiredicilär, Oleg Duloglonun materialında.
Mart ayın 27 -dä Teatr günündä Dionis Tanasoglu adına Gagauz Milli teatrusunun «Oglan hem Länka » pyesası sevindirdi hepsi siiredicileri.
Nicä nışannadı teatrunun öndercisi Mihail Konstantinov, piyesa «Oglan hem Länka» kuruldu 1997 yılda Gagauz Milli teatrusununnan bilä.
«Bu spektakliynän açıldı Gagauz Milli teatrusunun perdesi. Bu yıl biz koyduk neetimizä bu spektakliyi enidän koymaa da göstermää siirediciyä maasuz Halklararası teatr günündä. Bununnan bilä bu neetimiz baalı raametli Dionis Tanasoglunun 100 yaşına, angısının adını teatrumuz taşıyer», — söledi Mihail Konstantinov.
Pandemiya süresindä dä Gagauz Milli Teatrusu savaşardı sevindirmää kendi siiredicilerini. Teatrunun art – direktoru, Oglanın rolünu oynayan Mihail Gagauz nışannadı, ani pek önemli insan pay alsın teatrunun spektaklilerindä.
«Biz pek isteriz, ki bizim insannarımız gelsin bizim teatruya. Çünkü Gagauziya Milli teatrusu bir. Biz pek isteriz, ani bizim siiredicilerimiz gelsin, da siiretsin hepsi bizim spektaklilerimizi. Artık 25 yıl çalışêrız biz», — nışannadı Mihail Gagauz.
Devlet kurumnarın temsilcileri, angıları geldilär spektakliyä, nışannadılar, ani türlü duyguları yaşadılar siiredincä spektakliyi. Onnar sayerlar, ani insan lääzım gelsin teatruya, çünkü teatruda gösteriler bizim adetlerimiz.
«Bu epizotlar, bu yaşamak, bunnar bizim halkımızda varmışlar, halizdän, gerçektän biz bunnarı gördük büün da. İnsanımız lääzım gelsin teatrulara, çünkü bizim aktölarımız halizdän da yıl-yıldan üüselderlar kendi professional uurunu», — paylaştı fikirlerinnän Moldova Parlamentin deputadı İvanna Köksal .
«Bän düşünerim ,ani lääzım bölä teatruları korumaa, yardım etmä onnara çok. Neçinki onnar vererlar bizä çok ilinnik, düşünmäk, ne olmuş ilerdän. Nesoy kötülär, nesoy sevinmişlär», — söledi Çadır dolayın başının işini götürän Natalya Şoşeva.
«Çok gözäl büün pieyesa geçti ,biz çok sevineriz. Göreriz, ani taa çok insan geler bizim piyesalara, çok gözäl, açan piyesalar koyulêr Gagauz dilindä. Biz çok lafederiz, ani lääzım gagauz dilimizi unutmayalım, unutmayalım bizim kulturayı, adetleri», — nışannadı Çadır kasabasının primarı Anatoliy Topal.
Bilim-Aaraştırmak merkezin uzmanı Pötr Paşalı söledi, ani geçmiş yıllardan sora biz göreriz, ani Gagauz Milli teatrusunun açılması için karar dooruydu.
«25 yıl geeri kuruldu bizim Gagauz Milli teatrumuz. Bu çok gözäl bir işti. Toplanıp hepsimiz kuvetlän, yardımcılarnan kurduk Gagauz Milli teatrusunu, o büün vaar. Büünkü gün Halklararası teatruların günü,o çok önemli bir gün», — söledi Pötr Paşalı.
Halklararası Teatr günündä dünnedä çoyu teatrularda geçer festivallär hem gösteriler spektaklilär.
Источник grt.md
