Gagauz milli teatrusu Naţional Teatru Premiyasından 5 ödül kabletti
Moldovanın Naţional Teatru Premiyasında «Gala Premıılor Unıtem-2022» DionisTanasoglu adına Gagauz Milli Teatrusu bu yıl kazandı 5 premiya.
Moldovanın Naţional Teatru Premiyası avşamı her yılın sonunda geçiriler. Burayı katılȇrlar Moldovanın profesional teatruları. Onnarın var hakı burayı yılın süresindä gösterilmiş spektaklilerinnän çıkmaa. Bu yıl yarışmakta pay aldı 42 spektakli. DionisTanasoglu adına gagauz milli teatrusu “Körlerin dünnesi” spektaklisininnän çıktı.
“En ilkin isteerim şükür etmää teatrunun uzmannarını, siyredicileri, angıları gelerlär bizä hem büük saygı bizim dostlarımıza hem kollegalarımıza Pridnestroviyanın N. Raneţkaya adına devlet teatrusundan D. Ahmadieva hem O. Yakimenkoya, angıları yardım ettilär bizä spektaklinin horeografiyasını hem plastikasını düzmää. Bu ödül verer bizä kuvet ileeri dooru da üüseklää dooru gitmää”, — söledi “Körlerin dünnesi” spektaklinin rejisörü Denis Baburin.
D.Tanasoglu adına gagauz milli teatrusu her yıl pay alȇr teatru ödüleri yarışmasında, ama bu yıl kabledilän ödüllerin sayısı şaştırdı herkezini, nışannadı teatrunun öndercisi Mihail Konstantınov.
“Bu yıl biz 5 ödül kazandık. 5 ödül getirdik evimizä. Bu ödüllär vererlär bizä taa çok kuvet, ani biz durgunmayalım hem işleyelim ileeri dooru”, — söledi Mihail Konstantınov.
Bu yıl D.Tanasoglu adına gagauz milli teatrusu 25-cı yıldönümünü nışannȇr. Bu yılların süresindä aktörlar kendi becerikliini gösterdilär diil sade Gagauziyanın hem Moldovanın sţenalarında, ama başka ülkelerdä dä.
“25 yılın süresindä bizi teatrucular, kritiklär, eleştirmennär Moldovadan gördülär dä söledilär, ani gagauzlar lääzım alsınnar bu premiyaları, çünkü onnar hak ederlär onu. Onuştan sanȇrım, ani bütün gagauziya sevindi bu işä”, — söledi D.Tanasoglu adına gagauz milli teatrusunun incäzanaat uurunda öndercisi Mihail Gagauz.
“Okadar sevindim hem duygulandım, ani çok şükür ederim te onnara, kim verdi bizä bu ödülleri. Evä geldik açık üreklän, sevinmeklän. Bizim evimizä getirdik 5 bölä nominaţiya”, — söledi teatrunun aktrisası Natalya İvançuk.
Gagauz milli teatrusunun uzmannarınınnan kazanılmış ödüllerin arasında artistik öndercilii ödülü, en ii hareografiya ödülü, en ii karı rolü ikinci planda ödülü, P.Barakçi premiyası hem yılın en ii dramatik spektaklisi ödülü.
Avtor: A.Terzi, video: G.Stavilov, montaj A.Gerçu
Источник grt.md 15.12.2022