D.Tanasoglu adına gagauz milli teatrusu kendi 25-ci yıldönümünä gösterdi eni spektakliyi
D.Tanasoglu adına gagauz milli teatrusu 25-ci yıldönümünü nışannȇȇr. Bu yortuya karşı teatrunun aktörları sţenaya Dionis Nikolaeviç Tanasoglunun “Uzun kervan” romanına görä “Uzieyälet. Son düüş” spektaklisinnän çıktılar. Spektaklinin premyerasında bulundu bizim televizion grupamız da.
2022-cı yıl Gagauziyanın Bakannık komitetin kararına görä Dionis Tanasogluya adandı. Bu gözäl olaya gagauz milli teatrusu bütün yıl kendi işini baaladı. Dionis Tanasoglunun “Uzun kervan” romanına görä “Uzieyälet. Son düüş” spektaklisini Gagauziyanın yaşayannarı özel duygularlan hem alkışlarlan karşıladılar.
“Teatro hem incäzanaat insanın yaşamasında büük rolü kaplȇȇr. Dionis Tanasogluyu bu yıl gözäl andı gagauzlar, okullar, kultura merkezleri. Teatru da, hakına, gözäl geçirdi iki sezonunu da. Biz siyrettik “Oglan hem Länkayı”, büün siyrederiz “Uzieyälet” . Bana kalsa en yakışıklı gagauz dilindä lafedän, kendi düşünmeklerini akıdan Dionis Tanasogluydu. Onuştan onun yaratmaları lääzım tanınsınnar hem teatru lääzım tutuklansın, siyredici dolu olsun da biz görelim bu insannarın işini, çünkü onnar çok kuvet bu iş için koyȇrlar”, — söledi Moldova Parlamenti deputatı İvanna Köksal.
“Pek dolu bizim içimiz, pek gözäl postanovka. Bu bir istoriya spektaklisi, angısını yazdı Dionis Tanasoglu hem ne islää, ani bizim gençlär büün yakışȇr gelsinnär hem görsünnär o istoriya olaylarını, angıları bizim dedelerimizlän oldular. Çok sevinerim, gagauz teatrusu yaşasın binnärlän yıl”, — söledi Gagauziyanın yaşayanı Tatyäna Karaseni.
DionisTanasoglu adına gagauz milli teatrusu Kıran ayın 26-da 1997-cı yılda temellendi. Aktörlar ozaman ilk sıra sţenaya “Oglan hem Länka” pyesasınnan çıktılar. 25 yılın süresindä teatru çok zorluklardan geçti, ama bakmayarak buna korundu, ilerledi.
“Teatrunun 25-ci yıldönümü anılmış bir gün, gözäl bir gün. Kaavi, gözäl bir premyera gördük. Pek sevinerim, ani büünkü spektakli gördü dünneyi, ani o çıktı. Ne var ne söleyim? Yaşasınnar, ilerlesinnär, yaşasın gagauzların kulturası”, — söledi Gagauziyanın kultura baş bakanı Marina Semönova.
Büün gagauz milli teatrusunu tanıyȇrlar hem bekleerlär halklararası sţenalarında da.
“Gagauz milli teatrusu çok büük bir yol geçmıştir, tarih için bu küçük bir devrä, ama bir teatru için uzun bir zaman. Büünkü spektakli büük bir eser bizä baaşladı hem inanȇrım, ani bununnan biz türk dünnesi sţenalarına çıkabiliriz. Gagauz milli teatrusunun gagauz halkının dilini hayatta tutan en güçlü varlıktır. Buna görä biz, herbirimiz , bütün türk dünnesi gagauz dilinin güçlü olmasına yardımcıyız ”, — açıkladı «TÜRKSOY» halklararası türk kulturası kurumun koorinatoru, bu kurumda Azerbacan devletini temsil edän Elçin Gafarlı.
D.Tanasoglunun “Uzun kervan” romanına görä “Uzieyälet. Son düüş” spektaklisi verdi kolaylık Gagauziyanın yaşayannarına eni bakışlan istoriyamıza dalmaa, dedelerimizin yaşamasını savaşmaa annamaa.
“Aktör gibi bu spektaklidä bän Araslan rolünu oynȇȇrım. Doorudan sölediynen diildi zor işlemää, çünkü bän teatru incäzanaatında pek çok yıl işleerim. Zordu te o, ani D.Tanasoglunun dili biraz başka türlü. Da o üzerä lääzım biraz kırmaa dilini götürmää deyni cümleyi, angısı yazılı pyesada”, — annattı D.Tanasoglu adına gagauz milli teatrusunun öndercisi Mihail Konstantinov.
D.N.Tanasoglunun “Uzun kervan” romanına görä “Uzieyälet. Son düüş” pyesasını Mihail Rezuneţ yazdı. Bu iş için yılın çeketmesindä kultura bakannıınnan maasuz yaratma konkursu geçirildiydi. Bu konkursun çıkışlarına görä en ii yaratma sţenada koyuldu.
“Burada isteerim şükür etmää bizim Mihail Rezuneţı, ani “Uzun kervanın” bir bölümünü alıp, onu pyesaya çevirdi. Hepsi aktörlara hem teatrunun çalışannarına isteerim dilemää saalık, mutluluk hem saalık onnarın aylelerinä, çünkü sade onnar bilerlär nesoy işleerlär onnarın eşleri”, — söledi D. Tanasoglu adına gagauz milli teatrusunun incäzanaat öndercisi Mihail Gagauz.
Siyredicilerä deyni incäzanaat avşamı başarıldı D.Tanasoglu adına gagauz milli teatrusunun gimnasının prezentaţiyasınınnan.
Avtor: A. Terzi, video: L.Arfanos, montaj: A.Gerçu
Источник grt.md
