“Kapital investiţıyalar” hem “Aydınnanmış küü programası” kanonnarına diişilmeklär bakıldı cümnä seslemeklerindä
Gagauziya Halk Topluşu deputatları cümnä seslemeklerin süresindä nışannadılar, ani “Kapital investiţıyalar» hem “Küüleri aydınnatmak”kanonnarında diişilmeklär lääzım olsun. Kanon kurucuları teklif ettilär beş kanon iniţıativasını iki kanona.
Gagauziya halk toluşu deputatları teklif ederlär kapital investiţıyaların bir payını vermää avtonomiyanın küülerin hem kasabaların primariyaların ilerlemesinä. Bölä olacȇk kolaylık taa faydalı işi kurmaa kuvetlerin arasında.
Hep ölä deputatın kayıllıı lääzım olacȇk, deyni giriştirmää investiţıya proektleri onun kasabasında yada küüyündä. Deputatın imzası lääzım olcȇk sade te o proktlerä, angıları devlet hem bölgä bücetlerindän ödeneceklär.
Gagauziya halk topluşun iki deputatı Aleksandr Tarnavskiy hem Mihail Jelezoglo bu diişilmeklerin avtorları. Deputatlar taa isteerlär, ki investiţiya proektlerin sayısını kabletsinnär Gagauziya halk topluşu deputatları.
«Te bu eni statyalarda biz teklif ederiz diişilmekleri. Taa derindän annaştırılȇr, ne o bölgä maanalarına girän proektlär. Bu ilk. İkinci, deputatlar sayȇrlar, ani küüyün hem kasabanın deputatın lääzım haberindä olsun, nesoy proekt giriştiriler», — söledi Aleksandr Tarnavskiy.
Deputatlar Georgiy Leyçu hem Nikolay İvançuk teklif ederlär biraz diiştirmää kanonu, ki birtürlü kriteriyalar olsun herbir küüyä hem kasabaya pay edilärkänä kapital invstiţıyalar. Georgiy Leyçu nışannadı, ani «Kapital investiţıyalar» kanonundan silineceklär te o statyalar, angıları engel ederlär dooru paraları pay etmää.
«Ne biz teklif eeriz: pay edilärkänä, paraları hepsi birtürlü kabletsin. Teklif ederiz bir ölçü belli etmää avtonomiyada. Sora esaba alarak küçük küüleri, ekleneceklär koefiţıentlar», — açıkladı Georgiy Leyçu.
Ki dooru pay edilsinnär kapital investiţıylar, deputat Nikolay Raya teklif eder kanona eklensin ta bir statya: bölgä hem erli investiţiya proektleri ödensinnär birtürlü. Deputat açıkladı mehanizmayı, nicä o görer paranın pay edilmesini.
«İlkin lääzım ödensin bölgä hem erili proektlär, angıları yarısınadan yapılı. Bitirilmemiş proektlär lääzım ön planda dursunar», — nışannadı Nikolay Raya.
Hep ölä cümnä seslemeklerin süresindä bakıldı dişilmeklär «Aydınnanmış küü Programası 2018-2027 yıllara» kanon proektinä. Eniliklerä görä verilecek kompensaţıyalar şafk sokaklarda geçirilmesi için harçlar için hem direklerin zamandaş uura getirilmesi için. Bu programaya başka da harçlar girer: yol nışannarı, renkli şafklar, kameralar için sokaklarda.
«Bilersiniz, ani 2018-ci yılda Halk Topluşu kabletti bu programayı. Bücettän herbir küü hem kasaba para kabletti geçirilsin deyni şafk sokaklarda», — söledi Mihail Jelezoglo.
Kanon kurucuların teklifleri bakılacȇklar Gagauziya halk topluşu oturuşunda.
Источник grt.md
