Deputatlar ensedilär başkanın vetosunu baş investiţıyalar kanonuna
Orak ayın 5-dä Gagauziya Halk topluşu masuuz oturuşunda kanon kurucular Başkanın vetosunu «Baş investiţıyalar» Kanonu için ensedilär. 22 deputat kendi sesini verdi ki diişilmeklär kanonda olsunnar.
«Baş investiţıyalar» Kanonu ilk sıra 2017-ci yılda hazırlandı hem kabledildi. Gagauziya Halk topluşu deputatları mehanizmayı kurdular baş investiţıyaların pay edilmesindä. Paralar maasuz formulaya görä verilerlär. 50% bütün paradan veriler bölge maanalı proektlerin çalışmasına, angılarını giriştirer Bakannıık komiteti, öbür 50% erideki proektlerä düşer, angılarını primariyalar teklif ederlär.
ALEKSANDR TARNAVSKİY, GHT başının yardımcısı: «Bundan kaarä kuruldu taa bir platforma. Ona görä küülär, neredä az kişi yaşȇȇr, taa zeedä investiţıya kableder. Bir kaç yıl kanon bölä mehanizmaylan uygun çalıştı».
Hederlez ayının 25-dä Halk topluşu deputatları kablettilär diişilmekleri » Baş investiţıyalar » Kanonuna. Diiştirdilär baş investiţıyaların verilmesinin önemlik sırası, genişlettilär dolay proektin tanımı, eklendi nokta, ani erideki proekt ayırılarkana baş investiţıyalara deyni, esaba alınsın deputatın bakışı lääzım. Deputatların bakışına görä Bakannıık komiteti 3 yıl sıravardı kanonu dooru annamȇȇrlar, onuştan da baş investiţıyaları yannış pay ederlär.
ALEKSANDR TARNAVSKİY, GHT başının yardımcısı: «2019-cu yılda 22 million,2020-ci yılda — 43 million, 21-ci dä 27 million. Baş investiţıyaları birkaç yıl sade regional maanasında proektlerä verdilär . Bu beterä erideki uurda eni proektlerin giriştirlenmesi durgundu.Kanon durdu erideki kuvetlerä deyni. Onuştan da diişilmeklär lääzım».
Dişilmeklerä göörä ilkin bütün para pay ediler eni regional hem erideki proektlerin arasında, sora ödenerlär yarım kalmış proektlär.
İVAN KOLİOGLO, infrastruktura hem düzmäk bakannıın başı: «Bu prinţiplärlän biz kayılız. Biz dä isteriz, ani baş investiţıyalar birtürlü pay edilsinnär. Ama burada tehnik elementi peydalanȇr. 3 % kalȇr, angısı ilerdän yollanardı küçük küülerä yardım gibi».
Bakannıık komiteti başının yardımcısı Olesä Tanasoglo nışannadı, ani proektlär, angıları ödenerlär baş investiţıyalardan, Gagauziya Halk topluşu deputatları ayırȇrlar.Bakannıık komiteti hem erideki kuvetlär sade teklif ederlär. Şindiki zaman Gagauziyada reestr yok ,angısına görä yakışacȇydı regional gem erideki obyektleri ayırmaa.
Gagauziya Halk topluşu başının yardımcısı Aleksandr Tarnavskiy annattı, ani regional obyektlerä girerlär ekonomikaylan, üüretim hem saalıık bölümnerinnän baalı proektlär.
OLESÄ TANASOGLO, Bakannıık komiteti başının yardımcısı: «Tekliflerin neeti Başkanın kararını ensemää. Ama biz karşı geleciiz problemaylan. Gagauziyanın iki kanonu biri -birinä karşı durȇrlar. Biz dä şindi orak ayı. Bizim baş investiţıyalar taa harcanmadılar. Ödenmäk durgundu hederlez ayın 15-dän iki kanonun beterinä. Baş investiţıyalar kanonunda bir prinţip, bücet kanonunda başka».
Diişilmeklär için «Baş investiţıyalar» kanonuna 22 deputat sesini verdi.
Источник grt.md
