Halk Topluşunda teklif ederlär giriştirmää Gagauziyada başbakan görevini
GHT reglament komissiyası geçirdi büün «Bakannıık komitetin bakannıkları için» kanon proektinin cümnä seslemeklerini. Onun avtoru Gagauziya Halk Topluşun başının yardımcısı Georgiy Leyçu. Bakannıklar kurulȇrlar Bakannık komitetin strukturasında hem Gagauziya Başkanın tekliflerinä görä.
«Bakannıık komitetin bakannıkları için» kanon proektindä GHT hem Bakannıık komitetin hakları belli edildi. Kanon kurucu hem yönetim kuvetleri olmaz karışsınnar bakannıkların işinä, sayȇr Gagauziya Halk topluşu başının yardımcısı Georgiy Leyçu. Büün hepsi bakannıklar itaat ederlär Gagauziyanın başkanına. Ama GHT kendi sırasında var nicä karışsın eerlim bakannıklarda yada onnara ilgili bölümnerindä kabledildiysä kanona karşı karar. Bu punktu deputatlar isteerlär Gagauziyanın baş kanonuna — Ulojeniyeyä eklemää.
«Şindiki zaman Gagauziyanın baş kanonuna görä GHT deputatları var nicä inkär etsinnär cümnä kuvetlerin herbir kararını. Vakıt gösterdi esaba alarak, ani iki kuvet dalı belli edildi. Diil dooru kabledilmiş karalar da daavada iptal edilsinnär. Şindi biz Gagauziyanın baş kanonunnan işleeriz, esaba alȇrız hepsi momentleri. Eerlim ekleyä bilärseydik bu teklifleri, ozaman annaşmamazlık olmayacȇk», — açıkladı kanon proektin avtoru Georgiy Leyçu.
Kanon proektindä belli edili sorumnar bakannıkların öndercilerinä dä. O görevlerä lääzım girsinnär maasuz kriteriyalara uyan uzmannar, onnarın arasında üüsek uurda becermeklär hem büük iş stajı.
«Bu görevä işlemää girdiynän bakannıın başı lääzım olacȇk Gagauziyada yaşasın. Bu bir önemli moment. Hep bölä sorumnar başkana hem GHT başına da. Bölä koruner baalantılar yaşayannarın hem kuvetlerin aralarında», — sayȇr Georgiy Leyçu.
«Bakannıık komitetin bakannıkları için» cümnä seslemeklerindä deputat Mihail Jelezoglo kendti ideyalarını açıkladı. O teklif etti bakannıkların kurulmasında hem yokedilmesindä Gagauziya Halk topluşun deputatları da pay alsın.
«Deputatlar, komissiyanın azaları sayȇrlar, ani var ölä bakannııklar ,angıları bir işi yapȇrlar, ama başka türlü adlanȇrlar. Deputatlar bakannııkların taa kurulmak adımında lääzım karışsınnar kendi tekliflerinnän. Ozaman kavgalar bitecek», — söledi Mihail Jelezoglo.
Deputat Nikolay Ormanjı kendi sırasında teklif etti «Bakannıık komitetin başı» kanonun 5-ci statyasını biraz diiştirmää. O sayȇr, ani lääzım premyer-ministru – başbakan — görevini giriştirmää.
Georgi Leyçu nışannadı, ani bakannınklar üridik cümnä adaleti, angısı lääzım Komratta bulunsun.
«Bu sorum sade baş bakannaa deyni. Başka Bakannık komitetindä kurulmuş administrativ kuvetlär, bölümnär,var nicä başka küüdä yada kasabada bulunsunnar», — söledi Leyçu.
Üridik bakannıı kayıl oldu «Bakannıık komitetin bakannıkları için» kanon proektinnän hem nasaat etti GHT kabletsin bu normativ aktını te nicä o temsil edildi.
Источник grt.md
