Çeşmeküüyüdä şannı açtılar Afgan cengin askerlerinä anmak taşını
İdeya açmaa Afgan cengin askerlerinä anmak taşını Çeşmeküüyüdä peydalandı Afgan cengin veterannarında. Onnar isteerlär, ki asker ortaklarını anması yaşasın insannarın üreklerindä da hiç unudulmasın.
Valkaneş dolayın Afgan cengin veterannarın birlii çoktan koydu neetinä açmaa Afgan cengin askerlerinä anmak taşını Çeşmeküüyüdä, nışannadı birliin başı Georgiy Pavlioglo. Dokuz ayın içindä uydu açmaa iki anmak taşını Valkaneş dolayında Afgan cengin askerlerinä, nışannadı o. Onnarın sayısına girer Çeşmeküüyün monumentı da.
«Valkaneş kasabasında var bir ölü Sergey Rudenko. Çeşmeküüyüdä büün açtık anmak taşını, angısını adadık Belikçi İvan Georgieviçä, angısı dönmmedi geeri evä Afganistandan, kaybeldi. Büünkü günä bilinmeer hiç bişey onun için», — açıkladı Georgiy Pavlioglo.
Moldova Afgan cengin veterannarı birliin başının ilk yardımcısı, respublika iç işlerin ministerliin veteranı Konstantin Boeştänu kutladı hepsini yortulan – Afganistandan askerlerin çıkarılmasının başlamasınnan. O haberledi, ani o ölmüşlerin girginnii yaşȇȇr insannarın üüreklerindä. Bütünnä Moldova devletindä koyulu yakın 30 anmak taşı asker cengin pay alannarına.
«Veterannar, angıları askerlik ettillär Afganistanda birliktä, onnar emin ettillär bu birlii hep korumaa. Hepsi bizim kardaşlar, angıları cenk ettillär Afganistanda, onnarın adlarını biz unutmayacez. Biz büün gösterdik, ani Afganistan cengin veterannarın birlii ilerler, geleceyı var», — nışannadı Konstantin Boeştänu.
Anmak taşının açılması – bu önemli olay küüyün yaşamasında, nışannadılar yortulu açılmasının katılannarı.
«Anmak taşının koyulması için işledilär saade bizim veterannarımız, bizim küüyümüzdän. Yardım etişti Rusiyadan, İzraildän, Amerikadan, Franţiyadan – Çeşmeküüyünün insannarından».
«Biz hiç bir zaman unutmayacez o uzak yılları, çekedip 1979 – 1989 – cu yılları. Biz her zaman tutacez aklımızda Afgan cengin bizim veterannarımızı».
«Biz yardımcı olduk Çeşmeküüyünün anmak taşının yapılmasında Afagan cengin askerlerinä».
Büünkü günä Valkaneş dolayında yaşȇȇr 56 Afgan cengin veteranı. İvan Belikçi sayılȇr kaybelän, Sergey Rudenko öldü cenktä.
1989 – cu yılın küçük ayın 15 – dä genk Afganistanda başarıldı, o gidärdi 9 yıl, 1 ay hem da 19 gün. Bu vakıdın içindä Afganistandan geçti 62 bindän zeedä asker, geçirildi 1 113 operaţiya, öldürüldü 41 216 duşman hem da 20 bindän zeedä silah yokedildi. Bu bir en uzun hem da kahırlı genk 20 – ci asirdä.
Источник grt.md
