Başküüdä açıldı Afgan cengin askerin Mihail Tanasoglonun hatırına muzey
Kirsovo küüyündä Mihail Tansoglo adına gimnaziyasında açıldı hep onun adına hem hatırına muzey. Mihail Tansoglo 1982-ci yılda Afganistanda asker davasını yaparkana öldü. Onun kahramannıını evlad bolaylarına bildirmää deyni muzeydä toplu Mihail Tansoglonun asker işinnän baalı bilgilär, patretlär, ödüllär hem başka eksponatlar.
2018-ci yılda Kirsovo küüyündä başladılar leytenantın, pilotun, Mİ-24 ȇkipajın başın Mihail Tanosoglunun hatırına muzeyi düzmää. O 1982-ci yılda geçindi Afganistanda. Dört yıl sıravardı muzeyi açmaa deyni işlär gitti. Bütündän remont yapıldı iki odada.
«Hatır güüderiz askerin yaptıklarına. Onnar diil lääzım unudulsunnar. Bu muzeylän hepsi Afgan cengin askerlerinä dä kendi saygımızı göstereriz. Te onnara, kim geeri döndü saa, hem te onnara, kim evä dönmedi. Büün gimnaziyada muzeyin yortulu açılışı geçti», — söledi M.Tanasoglo adına gimnaziyasının başı Mariya Boykova.
Fikir açmaa bölä bir muzey M.Tanasoglo adına gimnaziyasının ilk direktorun aklısına geldi. Bu neeti destekledi primariya hem Kirsovo küüyün soveti, Halk Topluşun deputatı Stepan Sarioglo.
Gagauziya Halk Topluşun deputatı İvan Karaja o üüretim kurumunda üürenmiş, nereyi M.Tanasoglo gezärmiş. Mihail kalmış onun aklısında nicä şenüzlü adam, angısı herbir kıpıma sevinärdi.
«Biz onnan tanıştık ceviz ayın bitkisindä. Ozaman o şansora pilottu. Yaz praktikasından sora bän kazarmaya geeri döndüm. Büün dä onun sözünü aklımda tutȇrım o zamandan: «İşittim burada gagauz varmış». Biz kardaşımnan bakışlandık. Mişa karagöztü ,kara bıyıkları vardı», — annattı İvan Karaja.
Mihayılı andılar onun senselleri, okul arkadaşları, dostları, aske ortakları. Moldovanın Afgan cengin veterannarın Birliin başı Mihail Mokan hem Gagauziyanın birliin başı Pötr Mavrodi çok kaçındılar, ki muzey açılsın hem dolu olsun ȇksponatlarlan.
«Bän tutȇrım aklımda açan Afganistanda cenk çeketti . Hepsi istäärdi orayı gitmää. Bän 100-län kişi bilerim, vatandaşlar, hak koruyucuları, yazardılar raport Afganistana cengä gitmää deyni. Allelem o patriotizm sayılardı», — söledi Mihail Mokan.
Kirsovo küüyün yaşayanı, M.Tanasoglunun okul arkadaşı Konstantin Çolak paraylan yardım etti. O anmak muzeyin açılışında baaşladı Arhangel Mihayıl hem Gavriil ikonalarını.
«Benim var taa bir istääm. Gimnaziyanın önündä bir anmak taşını koymaa üstündä dä vertolöt Mİ-24 olsun. Çoyu adadı yardım etmää, umutlanȇrım yapabilecez», — paylaştı Konstantin Çolak.
Mihail Tanasoglunun senselesi Natalya şindiki zaman askerin adına gimnaziyada üürener. O hodulluklan kendi çuçusu için annadȇr.
«Dayman avşam üstü onun patretlerini bakȇrız, bobam onun için annadȇr bizä. Biz sevineriz hem hodullanȇrız, ani gimnaziya ,neredä biz üüreneriz, M. Tanasoglu adına», — paylaştı kız.
Anmak muzeyin açılışında M.Tanasoglu adına liţeyin üüredicisi Olga Tretyak çaldı türkü kahraman için, angısı cenktän geeri dönmedi.
Kirsovo küüyün gimnaziyası hodulluklan Mihail Kirilloviç Tanasoglunun adını taşıyȇr, angısı kahramannıklan kendi asker görevini götürdü Afgan cengindä.
Источник grt.md 30.03.2022