Çadır kasabasının cümnä aktivisti: “2022 yıla yolları düzmäk planında kararların proektleri yok primariyanın saytında”
Çadır kasabasında yollarının düzmesinä 2022 yılda verildi 5 milion ley. Bu uura paralar geçirildilär Moldovanın Yol Fondundan, ki eniletmää kasabanın infastrukturasını.
Çadır kasabasının cümnä aktivisti Anna Mihalçuk GRT kanalın “Общественный интерес” programasında «Открыто и честно» proektin sınırlarında açıkladı, ani kasabanın yolların düzmäk planında 2022-ci yıla primariyanın internet saytında yok yapılacek düzmäk işleri için karar proektları.
ANNA MİHALÇUK, Çadır kasabasının cümnä aktivisti: “O hiç yoktu, nesoy var nicä insannar bundan sora pay alsınnar kararların kabledilmesindä. Bundan kaarä, var olaylar, açan veriler plan, sora sade sovet kableder başka uurlarda fikirleri, da hiç insanı haberlämeer. Aardılıp onnara da, katêr hiç esaplanmadık sokakları. Çıkış nesoy — yapılêêrlar belli olmadık yollar, neredä yaşêêrlar öndercilär”.
Kabledilmiş proektä diişilmeklerin yazılması – türlü kurallara karşı yapılan yannışlıklar, çizgiledi Anna Mihalçük.
Uzmannarın laflarına görä, lääzım geçirmää hertürlü görüşmeleri yaşayannarlan, taa kararları kabletmedän. Vatandaşların bakışları läzım ön planda olsunnar, nışannadı Lübov Kasım.
LÜBOV KASIM, cümnä aktivisti: “Bakarak ona, ani eer sokakların yaşayannarı katılȇrlar paraylan düzmäk işlerinä, esaba läzım alınsın o iş, ani kimi sokaklarda yaşȇrlar ihtärlar. Da bölä sokaklar için yok kim sölesin da arkalasın onnarı”.
Cümnä seslemeklerin çıkışları sade nasaat olarak kablediler. Bu yıla Çadır kasabasının içänkı yolların düzmesinä 5 milion ley verildi devlet yol fondundan, söledi ürist Dmitriy Kiseev.
DMİTRİY KİSEEV, ürist: “Ön planda var nasıl dursun türlü neetlär, elbetki, deyelim, kaç yıl yol enilenmedi. Aslında bölelär çok yok, ama hep var ölä sokaklar, neredä hiç bir taş erleşmedi yıllarca. Bundan başka, okullara, bolniţalara, uşak başçalarına hem başka soţial tarafından önemli kurumnara götürän yollar”.
Yolları düzmäk planı kurulȇr 3 punkttan: 1 – bayırdan aşaa dooru yollar, çünkü kasaba birkaç bayır üstündä bulunȇr. 2 – sokaklar, angılarında kasaba avtobusları gezer. 3 – cümnä erlär.
ANDREY MİHAYLOV, Çadır sovetin azası: “4-cü punkta görä yaşayannarın var hakı danışmaa primariyaya, sovedä, payınnan katılmaa düzücülük işlerinä – bir laflan bildirmää isteklerini, ki onnarın sokaa esaba alınsın, ama eer boşta kalan para olarsaydı. Yollar yapılȇrlar bitkiyadan, bitirilmedik yok bizda. Para da etmäärsaydı, primariya annaşȇr işleri yapan firmaylan da ödemeklär yapılȇr 2 — 3 adımda. Onuştan işlär yapılȇrlar danışmaklara görä hem yolun önemliinä görä”.
“Comunitatea mea” programasına görä plannandı Çadırda düzmää 30 yol, haberledi Çadır primariyasının yatırım bölümün uzmanı Nikolay Dişli.
NİKOLAY DİŞLİ, Çadır primariyasının yatırım bölümün uzmanı:“İnsannarın proeklara payınnan katılmalar hep onnarın kararlarların alınmasında bir instrument olarak sayılȇr. Var bizdä ii örneklär -Molodöjnaya sokaa, onda birbuçuk kilometra yapıldı. O İFAD proektına görä oldu. Sade onun tertiplemesi kurdu 5 milion ley”.
Gagauziyanın Bakannık komiteti küçük ayın 18-dä kendi oturuşunda verdi paraları avtonomiyanın dolay yolların düzmesinä. Bütündän bu sayılar avtonomiyanın bücetında kurdular 21,7 milion ley.
Источник grt.md 11.03.2022