Avtonomiyanın çiftçileri danışaceklar problemalarınnan devlet kuvetlerinä
Agarariyalara yardım etmäk assoţiaţiyası “Bucak” kabletti rezolüţıyayı, angısına yazıldı en önemli büünkü günä problemalar. Kiyat yazıldı barabar çiftçi bakanıınan da verilecek devletin kuvetlerinä, ki onnar diil sade esaba alsınnar durumu çiftçilik bölümündä, ama bulsunnar çıkışları bu zor durumda. Taa derindän süjetımızda.
Bu yıl agrariyalar karşı geldilär diil sade kuraklıklan, angısı olȇr herbir üç-dört yıl, ama pterol, beslemäk malların paalılanmasınnan, beslemäk malların paaların üüselmesinnän hem onunnan, ani yok nereyi satmaa bırdırkı hem buyılkı bereketi. Bu problemelar topladılar assoţıaţıyanın azalarını, ki açıklamaa hepsi bu soruşları da danışmaa devlet kuvetlerinä, ki onnarı yardım etsinnär çözmää.
SEMÖN NOVAK, Komrat çiftçi çorbacılıın başı: “Petrol malları için lääzım danışmaa, beslemäk materialları için, angıların paası 20-25 bin ley tonu kurȇr büün. Biz büün da satamȇrız ekini 4,5 leyä. Ama şindi treyderlar hiç almȇȇrlar, zerä çekettilär satmaa Ukrainanın ekinini. Bizdä var ambarlarda taa bıldırkı bereket, buna taa bıyılkı bereket eklendi”.
HARLAMPİY KİRLİ, Baurçi çiftçiçorbacılıın başı: “Olmarsaçiftçi kurumnarı, büdjet taa kötü olacek. Hem taa bir, ani bu danışmak olsun barabar çiftçi bakanıınan”.
NİKOLAY ÇOBAN, Kazayak çiftçi çorbacılıın başı: “Durum hepsindä bir: kuraklık yıl, ama en büük soruş satmaa bereketi . Nicä biz annadık, Rumıniyada satılȇr 360 dollar tonu, erlem büün satarsaydık bu paada var nicä almaa beslemäk materiallarını”.
Agrar bakanıın başı açıkladı nekadar toplanıldı boday bereketi. Biçildi 45 bin ektar, orta bereket kurdu 11,5 tondan yukarı. Bütündän bu yıl kaybedildi 40 proţent bereket. Toplanıldı 96 bin tondan zeedä boday. Kuraklıın beterinä hem petrol malların paaya kalkması, kreditlerin büümesi, sulamak sistemaların yokluu var nicä getirsin ona, ani çiftçilik bölümü çökecek. Hepsi bu problemalar lääzım bakılsınnar devlet uurunda.
Agarariyalara yardım etmäk assoţiaţiyasının başı Pötr Tomaylı açıkladı baş problemaları, angılarınnan bu yıl karşı geldilär çiftçilär hem okudu rezolüţiyayı, angısı verilecek merkez kuvetlerä. Baş soruş, angısı kaldırıldı buluşmada, baalı onnan, ani yardım etsinnär satmaa bodayı hem versinnär finans ki kurumnar koysunnar her bir yaşamak punktunda avadannık briket yapması için, da vermää insana ki kışın yaksınnar, he kurmaa kurumu, angısı finans tarafından yardım edecek agrariyalara.
PÖTR TOMAYLI, Agarariyalara yardım etmäk “Bucak” assoţiaţiyasının başı: “Bizdä yok bir da kendi finans kurumumuz, bankamız, da biz yalvarȇrız bizim kuvetleri, ki yardım etsinnär bizä bu uurda. Biz bir sestä kararladık ki bu kredit kurumu olsun”.
Andrey Dimitroglo urguladı, ani var annaşmalar çiftçilik ministrusunnan Vasiliy Böläylan, angısı bu yakınnarda gelecek Gagauziyaya da buluşacek agrariyalarlan.
Источник grt.md
